سورة البلد

نہیں، حقیقت وہ نہیں ہے جو تم لوگ سمجھے بیٹھے ہو، بلکہ (اللہ تعالیٰ فرماتے ہیں) میں قسم کھاتا ہوں اس شہر مکہ المکرمہ کی۔

اور آپ کیلئےاس شہر میں (فتح مکہ کے دن جدال وقتال) حلال کردیا گیا ہے۔
اورقسم ہے باپ کی(یعنی آدم کی) اوراس کی اولاد کی۔
یقیناً ہم نے انسان کومحنت ومشقت میں پیدا کیا ہے۔

کیا وہ سمجھتا ہے کہ کوئی اس پرقابو نہ پاسکے گا؟
(جب اس کو دین حق کی طرح بلایا جاتا ہے توحق کے ہی مٹانے کے لئے خرچ کرنے کوہنر سمجھتا ہے۔ دولت کے نشہ میں فخروغرور سے) کہتا ہے میں نے ڈھیروں مال اڑادیا۔

کیا وہ سمجھتا ہے کہ کوئی اس کا نگران اور پرسش کرنے والا نہیں ہے۔
(کہ اس نے کن ذرائع سے یہ دولت حاصل کی تھی اور کن اغراض ومقاصد میں کھپایا تھا)

کیا ہم نے اس کو دو آنکھیں نہیں دیں۔؟
ہم نے اس کو دوہونٹ نہیں دیئے؟

کیا ہم نے اس کو(حق وباطل) کے دونوں راستے نہیں دکھائے؟
پس اس نے دشوار گزار گھاٹی سے گزرنے کی ہمّت نہ کی

اور آپ کیا جانیں کہ وہ دشوار گزار گھاٹی کیا ہے۔
کسی کی گردن چھڑانا۔یعنی غلاموں کو آزاد کرانا۔

یافقر وفاقہ کے دن کھانا کھلانا۔
یتیم رشتہ دار کو۔
یا خاک نشین مسکین کو۔

پھر ان لوگوں میں شامل ہو جو ایمان لائے۔
اور (دین حق کی بقا واشاعت میں مخالفین حق کی پہنچائی ہوئی تکلیفوں پر) صبر اور لوگوں پرشفقت کرنے کی وصیت کرتا رہے۔

یہی لوگ ہیں دائیں بازووالے (یعنی سعادت مند اور جنتی)
اورجنہوں نے ہماری آیتوں کوماننے سے انکار کیا وہ ہیں

بائیں بازو والے۔
ان پر آگ مسلط رہے گی۔