توضیح: سورۃ الفاتحہ الٰہی تعلیمات کا لب ِ لباب ہے۔ اور بندۂ عاجز ومحتاج کی ایک درخواست بھی جو اللہ تعالیٰ نے اپنے بندوں کو سکھائی ہے کہ اللہ ہی کی عبادت کی جائے اور اللہ تعالیٰ ہی سے استعانت چاہی جائے۔ مالک یوم الدین سے نجات ومغفرت کی دعا کی جائے۔ ان بندوں کی اتباع وتقلید کی توفیق مانگی جائے۔ جن پر اللہ تعالیٰ نے نعمت خاصہ کی نوازش فرمائی۔ اللہ تعالیٰ کے خصوصی انعام یہ ہیں۔دین وایمان پر استقامت۔ قرآنی بصیرت۔ ایمانی جرأت وفراست ۔ اللہ رسول کی والہانہ باطل شکن اطاعت وفرماں برداری۔ اہل حق سے محبت حق کے مخالفین سے عداوت۔ نیکیوں سے رغبت ۔ برائیوں سے نفرت۔ حق پر قائم رہنے اور دین حق برپا کرنے کیلئے دین کا ہر نقصان گوارہ کرنے کی ہمت۔ دنیا میں نیکیوں کی اشاعت۔ اور برائیوں کو مٹانے کا عزم وحوصلہ مصیبتوں میں صبر ورضا۔ نعمتوں میں شکر واطاعت۔ کاروبار میں توکل، گناہوں پہ توبہ مخلوق سے بے خوفی ونا امیدی، اللہ تعالیٰ ہی سے خوف وامید ہر حرکت وسکون میںاللہ تعالیٰ ہی کے فضل ورحمت پر نظر ۔ دل ودماغ علم الٰہی کے نور سے منور ۔ دنیا سے بے رغبتی اور آخرت کی والہانہ طلب وحرص۔