سورة الكهف

اللہ کے نام (اسی کی مدد) سے جورحمٰن اور رحیم ہے، میں اس کا م کا آغاز کر ر ہا ہوں۔

ساری تعریفین اللہ تعالیٰ ہی کیلئے ہے جس نے اپنے بندے (محمد ﷺ ) پریہ کتاب (قرآن) نازل فرمائی۔

اورجس میں کسی اعتبار سے کوئی خامی (پیچیدگی) نہیں رکھی (یعنی اس کے تمام احکام ومضامین عقل وفطرت کے مطابق انسان کی بھلائی کیلئے نہایت اعتدال کے ساتھ نازل کیے گئے) جودین پر استقامت بخشتے ہیں۔

تا کہ (نافرمانی کرنے والوں کو) اس کی طرف سے آنے والے سخت ترین عذاب سے ڈرائے۔

اوران تمام اہل ایمان کے لیے (جنہوں نے الٰہی تعلیم کے مطابق زندگی بسرکی) خوشخبری سنائیے کہ ان کے لیے اللہ تعالیٰ کے
پاس بڑا ہی اچھا بدل جنت ہے جس میں وہ ہمیشہ ہمیشہ رہیں گے۔

اوران لوگوں کوڈرائیے جوکہتے ہیں کہ اللہ نے کسی کواپنا بیٹا بنالیا ہے (یعنی اپنی فرمانروائی میں شریک کاربنا رکھا ہے)

اس کا صحیح علم نہ ان کوہے اورنہ ان کے باپ دادا کوتھا (یعنی حقیقت کیا ہے یہ جانتے ہی نہ تھے)

بڑے ہی گناہ کی بات ہے جوان کے منہ سے نکلتی ہے۔

جوکچھ یہ کہہ رہے ہیں محض جھوٹ ہی جھوٹ ہے۔

شاید کہ آپ اپنے کوہلاک ہی کرڈالیں اوررنج وغم کے سبب کہ یہ لوگ اس کلام پرایمان نہیں لارہے ہیں ۔

ہم نے زمین پرجتنی بھی چیزیں بنائی ہیں اس میں زیب وزینت (جاذبیت وکشش) رکھی ہے۔

تا کہ ہم لوگوں کا امتحان لیں کہ کون اچھا عمل کرتا ہے ۔

اورجوچیزیں زمین پر ہیں ہم ان سب کوفنا کرکے زمین کوایک چٹیل میدان بنادیں گے۔

(ائے نبیؐ) غار اورلوح(تختی) والوں کے متعلق آپ کا کیا خیال ہے ؟ کیا آپ انھیں جانتے ہیں ؟

(تختی والوں سے مراد جہاں پہاڑ پران کے نام کندہ ہیں) وہ ہماری عجیب نشانیوں میں سے تھے۔

جب ان نوجوانوں نے غار میں پناہ لی تو دعا کی کہ ائے ہمارے پروردگار ہم پراپنی رحمت نازل فرما اور اس معاملہ میں ہمارے لیے بھلائی کا سامان کردیجئے۔

پھر ہم نے اسی غار میں سال ہا سال تک ان کے کانوں پر(نیند کا) پردہ ڈال دیا (یعنی ان کوسلادیا)

پھرانھیں جگایا تا کہ ہم دیکھیں کہ کون سی جماعت ان کے غار میں رہنے کی مدت کا صحیح اندازہ کرسکتی ہے۔

ہم ان کا صحیح واقعہ آپ سے بیان کرتے ہیں۔

وہ چند نوجوان تھے جواپنے رب پر(صدق دل سے یعنی بلاشائبہ شرک) ایمان لائے تھے اورہم نے ان کی ہدایت میں اضافہ کیا۔

(اورجب انہوں نے ایمان پرقائم رہنے کا تہیہ کرلیا تو) ہم نے ان کے دلوں کومضبوط کردیا (استقامت بخشی)

جب وہ اٹھ کھڑے ہوئے توکہنے لگے ہمارا پروردگار تووہ ہے جوآسمانوں اورزمین کا مالک ہے۔

ہم اس کے سوا کسی کومعبود سمجھ کرنہیں پکاریں گے، اگر ہم ایسا کریں تویہ (عقل کے خلاف) بڑی ہی بیجا بات ہوگی۔

ہماری قوم کے ان لوگوں نے اللہ تعالیٰ کے سوا اورمعبود بنا رکھے ہیں۔

بھلا یہ ان کے معبود ہونے پرکوئی واضح دلیل کیوں نہیں لاتے۔

پھراس سے بڑھ کرظالم کون ہوگا جواللہ تعالیٰ کے متعلق جھوٹے عقائد گھڑے۔

اور( پھر انہوں نے آپس میں کہا) جب تم قوم ( کے ان مشرکین) سے اوران کے شرکاء سے (ان سے جن کی یہ اللہ کے سوا عبادت کرتے ہیں) کنارہ کش ہوگئے ہو تو چل کرغار میں پناہ لو۔

تمہارا رب تم کواپنی رحمت سے نوازے گا اوروہ تمہاری اس کوشش میں ہر طرح کی آسانیاں پیدا کرے گا۔

اوراگر آپ طلوع آفتاب کے وقت دیکھیں توسورج ان کے غار کی داہنی طرف سے گزرجاتا ہے (اس طرح کے عمل سے دھوپ ان پر نہیں پڑتی)

اورجب غروب کے وقت دیکھیں توبائیں جانب سے گزرتا ہے۔ حالانکہ وہ اس غار کے ایک کشادہ حصہ میں ہیں،اورجب غروب کے وقت دیکھیں توبائیں جانب سے گزرتا ہے۔ حالانکہ وہ اس غار کے ایک کشادہ حصہ میں ہیں،

یہ اللہ تعالیٰ کے (قادرمطلق اورمختار کل ہونے کی) نشانیوں میں سے ایک نشانی ہے۔

جس کواللہ تعالیٰ ہدایت دیں وہی ہدایت پاتا ہے (جوہدایت کی طرف رجوع ہوتا ہے اس کوہدایت دی جاتی ہے)

اور جس کو حق تعالیٰ گمراہی میں پڑا رہنے دیں توپھر نہ کوئی اس کوراہ دکھانے والاہے اور نہ کوئی دوست اس کا ساتھ دیتا ہے۔

اورائے نبیؐ اگرآپ انھیں دیکھتے تویہی خیال کرتے کہ وہ جاگ رہے ہیں۔ حالانکہ وہ سورہے ہیں۔ اورہم ان کودائیں اوربائیں کروٹیں بدلواتے ہیں،

اوران کا کتا غار کے دہانہ پردونوں ہاتھ پھیلائے بیٹھا تھا (ائے نبیؐ) اگرآپؐ انھیں جھانک کردیکھتے توپیٹھ پھیر کربھاگ جاتے اوران کا خوف آپ کے دل میں بھرجاتا ہے۔

اوراسی طرح ہم نے انھیں طویل نیند سے جگایا تا کہ وہ آپس میں ایک دوسرے سے اپنے احوال پوچھیں

ان میں سے ایک نے پوچھا کہو تم کتنی مدت سوتے رہے؟

انہوں نے جواب دیا ایک دن یا اس سے بھی کم۔

انہوں نے کہا تمہارا پروردگار ہی جانتا ہے کہ تم کتنی مدت سوتے رہے۔

لہٰذا (اب ان باتوں کوچھوڑو) اپنے میں سے کسی کو یہ سکے دے کرشہر میں بھیجو۔

اوراچھی طرح دیکھ لے کہ کونسا کھانا پاک (حلال) ہے پھر اس میں سے تمہارے لیے لے آئے۔

اوراس حسن تدبیر کے ساتھ جائے اورآئے کہ کوئی تم کوپہچان نہ سکے۔

اگروہ تم پرمطلع ہوجائیں توتم کوسنگسار کریں گے۔

یا زبردستی اپنے باطل دین میں لوٹائیں گے اورپھرتم (ان کے پنجہ ظلم سے نکلنے میں) کبھی کامیاب نہ ہوسکوگے۔

اوراسی طرح ہم نے (لوگوں کو) ان کے حال سے خبردار کردیا تا کہ وہ جان لیں اللہ تعالیٰ کا وعدہ سچا ہے۔

اوریہ کہ قیامت کے واقع ہونے میں کوئی شک وشبہ نہیں ہے۔

اس وقت لوگ ان ہی کے تعلق سے جھگڑنے لگے کہنے لگے (یاد گار کے طور پر) ان کے غار پرایک عمارت بنادو

(بعضوں نے کہا ان کوان کے حال پرچھوڑدو) ان کا پروردگار ان کے احوال سے خوب واقف ہے۔

ان لوگوں نے کہا جوبرسراقتدار تھے ہم توضرور ان پرایک عبادت گاہ بنائیں گے۔

بعض لوگ (قیاساً) کہیں گے وہ نوجوان تین ہیں چوتھا ان کا کتا ہے

اوربعض کہیں گے وہ پانچ ہیں چھٹا ان کا کتا ہے ، سب ظنی اور غیر تحقیقی باتیں کرتے ہیں۔

اوربعض کہتے ہیں وہ سات ہیں آٹھواں ان کا کتاہے

کہئے میرا رب ہی ان کی صحیح تعداد جانتا ہے، ان کی صحیح تعداد سے بہت کم لوگ واقف ہیں۔

لہٰذا ان کی تعداد کے بارے میں سرسری بحث کے سوا کوئی تفصیلات میں نہ جائے۔

اوران کے بارے میں کسی سے کچھ نہ پوچھئے۔

اورکسی کام کی نسبت یوں نہ کہنا کہ میں اسے کل کروں گا مگریہ کہ اللہ چاہے توکروں گا۔

اوراگر آپ کبھی ان شاء اللہ کہنا بھول جائیں توجب بھی یاد آجائے ان شاء اللہ کہہ دیا کیجئے۔

اورکہئے مجھے امید ہے کہ میرا رب مجھے اس سے بھی زیادہ ہدایت کی باتیں بتائے گا۔

(اصحاب کہف کے بارے میں اتنا جزواورسن لیجئے) کہ وہ غار میں تین سو سال رہے (بعض کا خیال ہے کہ) نوسال اورزیادہ رہے۔

کہئے اللہ تعالیٰ ہی خوب جانتے ہیں کہ وہ کتنی مدت رہے

آسمانوں اورزمین کی ساری پوشیدہ چیزوں کا علم اسی کو ہے وہی ہرشئی کونظرمیں رکھے ہوئے ہے اوروہی سب کچھ سنتا ہے۔

اس کے سوا ان کا کوئی کارساز وحاجت روا نہیں اورنہ اس نے اپنی فرمانروائی میں کسی کوشریک کیا ہے ۔

اور(اس بنیادی حقیقت کو) جواپنی کتاب کے ذریعہ آپ پرمنکشف کی گئی ہے پڑھ کرسنایا کیجئے۔(کہ اللہ تعالیٰ ہی بلا شرکت غیرے معبود ومستعان ہیں اللہ تعالیٰ نے افراد خلق میں سے کسی حیثیت سے بھی اپنی حکومت میں شریک ودخیل نہیں فرمایا ہے)

اسکے احکام کوئی بدل نہیں سکتا (قانون الٰہی میں کوئی تبدیلی نہیں ہوسکتی۔

اورآپ اس کے مقابلے میں ( اس کے عذاب سے بچنے کے لیے) کوئی جائے پناہ نہ پاؤگے۔

اورجو(غریب) صبح وشام اپنے پروردگار کوپکارتے ہیں اوراس کی خوشنودی کے طالب رہتے ہیں ان کا ساتھ دیجئے۔ صبروضبط کواپنائے رہئے۔

اوردنیوی زیب وزینت کی خاطر ا(اہل ایمان) سے بے التفاتی نہ برتیے۔

اور اس کا کہنا نہ مانئے جس کے دل کو ہم نے (انتقاماً) اپنی یاد سے غافل کردیا ہے۔ اور جو(بلا روک ٹوک) اپنی خواہشات کی پیروی کرتا ہو۔

اور اس کا کام حد سے گزر گیا ہو۔اس کا کہنا نہ ماننا۔

ائے نبی کہہ دیجئے( لوگو) یہ قرآن برحق تمہارے پروردگار کی طرف سے نازل کیا گیا ہے لہٰذا جوچاہے ایمان لائے اور جوچاہے انکار کرے۔

یقیناً ہم نے ظالموں (مشرکوں) کیلئے (دہکتی ہوئی) آگے تیار رکھی ہے۔

جن کی قناتیں انھیں گھیری ہوئی ہوں گی۔

اوراگر وہ (پیاس سے بے تاب ہوکر) فریاد کریں گے توایسے پانی سے فریاد رسی کی جائے گی جوپگھلے ہوئے تانبے کی طرح ہوگا جومنہ اور چہرے کوبھون ڈالے گا۔

لہٰذا وہ پینے کی کیا ہی بری چیز ہوگی اوران کا ٹھکانا بھی کیا ہی برا ہوگا۔

جولوگ ایمان لائے اورنیک اعمال کرتے رہے(یعنی جنہوں نے الٰہی تعلیمات قبول کی اوراس کے مطابق زندگی بسر کی)

نیک کام کرنے والے کا اجر ہم ضائع نہیں کرتے۔

یہ وہ لوگ ہیں جن کے لیے (ہمیشہ ہمیشہ رہنے کے) باغ ہیں جن کے نیچے نہریں بہتی ہوں گی۔

اس میں ان کوسونے کے کنگن پہنائے جائیں گے۔

اوروہ وہاں سبز ریشم کے باریک اوردبیز کپڑے پہنے ہوں گے۔

اورمسندوں پرگاؤتکیے لگائے (شاہانہ انداز سے) بیٹھے رہیں گے۔

کیا ہی اچھا بدلہ اورکیا ہی آرام کی اچھی جگہ ہے

(ائے نبیؐ) آپ انھیں (مخاطبین قرآن کو) ان دوشخصوں کا حال سنائیے۔

جن میں سے ایک کو ہم نے انگور کے دوباغ عنایت کیے تھے۔

اوران باغوں کی باڑکھجور کے درختوں کی تھی اوراس کے درمیان کھیتی بھی لگارکھی تھی۔

دونوں باغ کثرت سے میوہ لاتے تھے۔

اوراس کی پیداوار میں کسی طرح کی کمی نہ ہوتی تھی۔

اوران کے درمیان ہم نے ایک نہر بھی جاری کررکھی تھی ۔

اوران باغوں کے تمام ثمرات کا وہی تنہا مالک تھا۔

ایک دن وہ اپنے ساتھی سے اثناء گفتگو میں کہنے لگا میں تم سے مال ودولت میں بڑھا ہوا ہوں، کنبہ اورخاندان کے اعتبار سے بھی زیادہ عزت والا ہوں(اس طرح کی شیخیوں کے ساتھ)

وہ اپنے باغ میں اپنے حق میں ظلم کرتا ہوا داخل ہوا (باغ کی سرسبزی وشادابی کودیکھ کر) کہا میں گمان بھی نہیں کرسکتا کہ یہ باغ کبھی تباہی کی سرحد کوبھی پہنچے گا (یعنی تباہ نہ ہوگا)

اورمیں نہیں سمجھتا کہ قیامت برپا بھی ہوگی (یعنی میرا گمان غالب ہے کہ قیامت برپا نہ ہوگی)

اور اگر میں اپنے رب کے پاس لوٹا یا بھی گیا توضروراس باغ سے بہتر پاؤں گا (کافر سمجھتے ہیں کہ گناہوں کے باوجود دنیا میں خوش حال زندگی کا حاصل ہونا اس بات کی علامت ہے کہ آخرت میں بھی اس سے بہتر زندگی ملے گی)

تواس کا دوست جواس سے گفتگو کررہا تھا کہنے لگا کیا تم اس اللہ کے الٰہ واحد معبود ومستعان )ہونے کا انکار کرتے ہو جس نے تم کومٹی سے پیدا کیا ؟

پھر نطفہ سے تم کوصحیح وسالم انسان بنایا ؟

لیکن میرا عقیدہ تو یہ ہے کہ وہی اللہ میرا رب ہے اورمیں اپنے پروردگار کے ساتھ کسی کوکسی حیثیت سے بھی شریک نہیں کرتا۔

اوراپنے ساتھی سے کہا جب تم اپنے باغ میں داخل ہوئے توتم نے مَاشَاءَ اللہُ لَا قُوَّۃَ اِلَّا بِاللہ کیوں نہیں کہا (یعنی یہ سمجھنا چاہئے کہ یہ سب اللہ تعالیٰ ہی کا فضل ہے اوراسی کی مہربانی ہے۔)

اوراپنے ساتھی سے کہا جب تم اپنے باغ میں داخل ہوئے توتم نے مَاشَاءَ اللہُ لَا قُوَّۃَ اِلَّا بِاللہ کیوں نہیں کہا (یعنی یہ سمجھنا چاہئے کہ یہ سب اللہ تعالیٰ ہی کا فضل ہے اوراسی کی مہربانی ہے۔)

اگر تم مجھ کومال واولاد میں اپنے سے کمتر دیکھ رہے ہو

توہوسکتا ہے کہ میرا پروردگار مجھے تمہارے باغ سے بہتر باغ عنایت کرے۔

اور(تمہارے) اس باغ پرآسمان سے کوئی آفت بھیج دے پھر وہ ایک چٹیل میدان ہوکر رہ جائے۔

یا پھر اس(نہر) کا پانی بڑی گہرائی میں پہنچ جائے، پھر تم اس کوکسی طرح بھی حاصل نہ کرسکو۔

اور(آخر کار) عذاب الٰہی نے اس کے ثمرات کواپنی گرفت میں لیا۔

پھر صبح وہ (اپنے باغ کواس طرح اجڑتے دیکھا کہ وہ ) اپنے منڈھوں سمیت گرپڑا ہے توجومال اس نے اس پرخرچ کیا تھا سب اکارت گیا، حسرت کے ساتھ کف افسوس ملنے لگا۔

اورکہنے لگا کاش میں اپنے پروردگار کے ساتھ کسی کو شریک نہ بنایا ہوتا۔

اوراس وقت کوئی جماعت اللہ کے مقابلہ میں اس کی کسی طرح کی کوئی مدد نہ کرسکی۔

اور وہ خود بھی اس مصیبت کا مقابلہ نہ کرسکا۔(اورنہ اللہ تعالیٰ سے بدلہ لے سکا)

یہاں( یہ حقیقت ثابت ہوگئی کہ حاجت براری وکارسازی بالکلیہ) حکومت اللہ تعالیٰ ہی کے اختیار میں ہے (وہی کارساز وحاجت روا ہے) وہی بدلہ بہتر ہے جواللہ دے اورنتیجہ کے لحاظ سے وہی انجام بہتر ہے جس کواللہ عطا کرے۔

(ائے نبیؐ) ان لوگوں سے دنیا کی زندگی کی مثال بیان کیجئے اس کی مثال

ایسی ہے جیسی ہم نے آسمان سے پانی برسایا ہو۔

پھر اس کے ذریعہ زمین سرسبز وشاداب( وبارآور)ہوگئی، پھر وہ ریزہ ریزہ ہوگئی، ہوائیں اسے اڑائے پھرتی ہیں۔

اوراللہ تعالیٰ ہرچیز پرپوری طرح قادر ہے۔

مال اوراولاد (جس کی محبت میں تم گرفتار اورجنہیں مطلوب ومقصود بنائے ہوئے ہو) وہ تو دنیوی زندگی کی ایک رونق ہیں (جنہیں بقاء نہیں اورجن سے امیدیں بھی پوری نہیں ہوتیں)۔

اوراعمال صالحہ ہی باقی رہنے والے ہیں، وہ آپ کے رب کے نزدیک بدل کے لحاظ سے بھی اعلیٰ وارفع ہیں اورامید کے اعتبار سے بھی ہزاروں درجہ بہتر ہیں (لہٰذا عقلمندی یہ ہے کہ انسان اسی کا تمنائی بنارہے)

اورجس دن ہم پہاڑوں کوچلائیں گے ائے نبیؐ آپ زمین کودیکھیں گے کہ وہ کسی چیز سے ڈھکی چھپی نہ رہے گی (صاف میدان کی طرح رہے گی)

اورہم ان سب کوجمع کریں گے (جوموت کے بعد دوبارہ زندگی کوممکن نہیں سمجھتے تھے محاسبہ اعمال کے بارے میں یقین نہیں رکھتے تھے) لہٰذا ان میں کسی کوبھی نہ چھوڑیں گے ۔

اور(محاسبۂ اعمال کیلئے) اپنے رب کے سامنے صف بستہ لائے جائیں گے۔

( اس وقت ان سے پوچھا جائے گاکیا یہ امرواقعہ نہیں ہےکہ ) تم ہمارے پاس اس طرح دوبارہ زندہ ہوکر آگئے جیسا کہ ہم نے تم کوپہلی مرتبہ کیا تھا۔

بلکہ تم اس خیال میں مست تھے کہ تمہارے اعمال کے محاسبہ کی یہ ساعت ہی نہ آئے گی۔

اوران کے سامنے ان کا نامہ عمل رکھ دیا جائے گا پھرآپ مجرمین کودیکھیں گے کہ جوکچھ اس میں لکھا ہوا ہوگا اس سے گھبرا رہے ہوں گے۔

اورکہیں گے ہائے ہماری تباہی وبربادی یہ کیسی کتاب ہے کہ ہرچھوٹی سے چھوٹی اوربڑی سے بڑی (بھلائی ہویا برائی) کسی بات کوبھی نہیں چھوڑتی مگریہ سب اس میں مندرج ہیں۔

اور جوکچھ انہوں نے کیا تھا وہ سب اس میں لکھا ہوا پائیں گے (ائے نبیؐ) آپ کا رب کسی پر رتی برابر ظلم نہیں کرتا، (یعنی ناکردہ گناہ نہیں لکھتا)

(اوروہ وقت بھی قابل ذکر ہے) جب کہ ہم نے ملائکہ کوحکم دیا تھا کہ وہ آدمؑ کوسجدہ کریں۔

ابلیس کے سوا سب نے سجدہ کیا جوجنات کی جنس سے تھا اس نے اپنے رب کے حکم کی نافرمانی کی

کیا تم اس کواوراس کی اولاد کومیرے سوا دوست بناتے ہو حالانکہ وہ تمہارے دشمن ہیں، ظالموں کے لیے (شیطان کی دوستی) کیا ہی برا بدل ہے۔

(اللہ تعالیٰ فرماتے ہیں) میں نے نہ توآسمانوں اورزمین کے پیدا کرتے وقت انھیں شاہد بنایا تھا اورنہ خود انھیں پیدا کرتے وقت۔

اورمیں (ایسا عاجز تو) نہ تھا کہ گمراہ کرنے والوں کواپنا دست وبازو بناتا(اجنہ جیسے گمراہوں کواپنا یہ اختیار دیتا کہ وہ جس کوچاہیں گمراہ کریں۔

اور(اس دن کو یاد رکھو) جس دن اللہ تعالیٰ فرمائیں گے جن کوتم ہمارا شریک سمجھتے تھے انھیں پکارو توسہی

لہٰذا وہ ان کوپکاریں گے مگر وہ ان کی پکار کا کوئی جواب نہ دیں گے۔

اورہم ان کے درمیان ایک آڑ کردیں گے(اوروہ آگ سے بھری ہوئی خندق ہوگی)

اورمجرمین (جہنم کی) آگ دیکھیں گے توخیال کریں گے کہ وہ اسی آگ میں ڈالے جائیں گے۔

اوروہ اس سے بچنے کی کوئی راہ نہ پائیں گے۔

اورہم نے اس قرآن میں لوگوں کوسمجھانے کے لیے طرح طرح کی مثالیں بیان کی ہیں۔

لیکن (منکر) انسان (حقائق کونہ ماننے کیلئے) سب سے زیادہ جھگڑتا ہے (اوربلادلیل اپنے بزرگوں کواس نظام کائنات میں دخیل وشریک سمجھتا ہے)

لوگوں کے پاس ہدایت آجانے کے بعد اس کوقبول کرلینے اوراپنے رب سے گناہوں کی معافی مانگنے سے کونسی چیز مانع ہوسکتی تھی؟

سوائے اس کے کہ گزشتہ امتوں کی طرح ان کے ساتھ بھی وہی معاملہ کیا جائے یا عذاب الٰہی ان کے سامنے آموجود ہو۔

اورہم رسولوں کواسی لیے بھیجتے ہیں کہ وہ (لوگوں کوجنت کی) خوشخبری سنائیں اورانھیں آخرت کے انجام بد (دوزخ سے) ڈرائیں۔

اور منکرین حق محض غلط اوربے اصل (باتیں نکال نکال کر) جھگڑتے ہیں تا کہ حق کونا حق ثابت کردکھائیں اورانہوں نے میرے احکام اور تنبیہات کو(جوانھیں کی گئی تھیں) مذاق بنا رکھا۔

اوراس سے بڑھ کرظالم کون ہوگا جس کواس کے رب کی تعلیم سنائی گئی

تواس سے اس نے روگردانی کی۔

اوراپنے ہاتھوں سے جوکچھ گناہ سمیٹ رہا ہے (اس کے انجام آخرت کو) بھول گیا۔

ہم نے (انتقاماً) ان کے دلوں پر پردے ڈال دیئے ہیں کہ اسے سمجھ ہی نہ سکیں۔

اوران کے کانوں میں ثقل پیدا کردیا (تا کہ وہ سن نہ سکیں)

اوراگر آپ انھیں ہدایت کی طرف لائیں تووہ اس حالت میں ہدایت کی راہ پر کبھی نہ آئیں گے۔

اور(واقعہ یہ ہے کہ) آپ کا رب بڑا ہی بخشنے والا صاحب رحمت ہے۔

اگروہ ان کی بداعمالیوں پرانھیں فوری گرفت کرتا توجلد ہی ان پر عذاب آجاتا۔

بلکہ ان کے لیے (عذاب کا) ایک وقت مقرر ہے۔

(جب وہ آئے گا تو) ان کیلئے اللہ تعالیٰ کے سوا کہیں جائے پناہ نہ ہوگی۔

اوریہ بستیاں جو ویران پڑی ہیں ان کے ظلم (کفروشرک) کی وجہ سے ہم نے انھیں تباہ وبرباد کردیا۔

اوران کی ہلاکت کیلئے ہم نے ایک وقت مقرر کردیا تھا (جوان سے ٹل نہ سکا)

(موسیٰؑ کے سفر کا وہ واقعہ بھی یاد رکھنے کے قابل ہے) جب کہ موسیٰ نے اپنے خادم سے کہا۔

میں یہ سفر اس وقت تک جاری رکھوں گا جب تک کہ دو دریاؤں کے ملنے کی جگہ پہنچ نہ جاؤں یا اس کے لیے برسوں چلنا ہی پڑے۔

جب وہ دونوں چلتے ہوئے دریاؤں کے ملنے کی جگہ پہنچے تواپنی اس مچھلی کوبھول گئے۔

جو خشکی پرسرنگ کی طرح راستہ بناتے ہوئے دریا میں چلی گئی۔

پھرجب وہ دونوں اس مقام سے آگے نکل گئے توموسیٰؑ نے اپنے خادم سے کہا ہمارا ناشتہ لے آؤ۔

یقیناً ہم اس سفر میں بہت تھک گئے ہیں۔

خادم نے کہا دیکھئے ایک عجیب بات ہوئی جب ہم چٹان کے پاس آرام کے لیے ٹھیرے تھے، میں اس مچھلی کا ذکر کرنا بھول گیا۔

میں اس واقعہ کا ذکر کرتا لیکن شیطان نے مجھے بھلادیا (مچھلی زندہ ہوئی) اوروہ عجیب طریقہ سے دریا میں اپنی راہ لی۔

موسیٰ ؑنے کہا یہی تووہ مقام ہے جس کی ہمیں تلاش ہے۔

پھر وہ دونوں اپنے قدموں کے نشان دیکھتے ہوئے واپس لوٹے۔

پس وہاں انہوں نے ہمارے بندوں میں سے ایک بندے کوپایا۔

جنہیں ہم نے اپنی خاص رحمت سے نوازا تھا

اور ہم نے انھیں ایک خاص علم بخشا تھا۔

موسیٰ نے ان سے کہا کیا میں آپ کے ساتھ رہ سکتا ہوں اس شرط کے ساتھ کہ جو مفید علم (اللہ تعالیٰ نے) آپ کو سکھایا ہے اس میں سے آپ مجھے سکھائیں۔

کہا تم میرے ساتھ رہ کر ( میرے کاموں کو) برداشت نہ کرسکوگے۔

اورتم کیسے برداشت کرسکتے ہو جب کہ تم ان باتوں کوحقیقت سے ہی بے خبر ہو۔

موسیٰ ؑنے کہا، اللہ نے چاہا توآپ مجھے صبر کرنے والا پائیں گے

اورمیں کسی معاملہ میں بھی آپ کی نافرمانی نہیں کروں گا۔

پھر انہوں نے (خضرؑ نے) کہا اگر تم میرے ساتھ رہنا چاہتے ہو تو شرط یہ ہے کہ تم مجھ سے کچھ نہ پوچھو۔(یعنی میری کسی بات پراعتراض نہ کرو)

تا آنکہ میں خود اس کی وضاحت نہ کردوں۔

پھر دونوں مل کر چلے تاآنکہ ایک کشتی میں سوار ہوئے تو(اس بندہ حق نے) اس کشتی میں سوراخ کردیا۔

موسیٰؑ نے کہا آپ نے اس کشتی میں اس لیے سوراخ کردیا کہ کشتی کے سوار ڈوب جائیں، آپ نے توبڑے ہی خطرہ کا کام کیا ہے۔

خضرؑ نے کہا کیا میں نے تم سے پہلے ہی نہ کہا تھا کہ تم میرے کاموں پر صبر نہ کرسکوگے۔

موسیٰ ؑنے کہا میری بھول چوک پرمواخذہ نہ کیجئے اورمیرے اس معاملہ میں مجھ پر زیادہ سختی نہ کیجئے۔

پھر کشتی سے اتر کر دونوں چلے یہاں تک کہ راہ میں ایک لڑکا ملا، پس انہوں نے اس کومار ڈالا۔

موسیٰ ؑنے کہا آپ نے بلا وجہ ایک بے گناہ کی جان لی یقیناً آپ نے بہت ہی برا کام کیا ہے۔