سورة المعارج

ایک پو چھنے والا پوچھتا ہے اس عذاب کے متعلق جو واقع ہونے والا ہے۔
کافروں کے لئے اس کوٹا لنے والا نہیں۔
وہ عذاب اللہ تعالیٰ کی طرف سے نازل ہوگا جو عروج کے زینوں(بلند ترین آسمانوں) کا مالک ہے۔

جس کی طرف روح الامین (جبر ئیلؑ) اور فرشتے اس کے حضور چڑھ کرجاتے ہیں
(وہ عذاب) ایک ایسے دن نازل ہوگا جس کی مقدار پچاس ہزار سال کے برابر ہوگی۔
پس(ائے نبی ﷺ کفار کی اذیت رسانیوں پر)صبر سے کام لیجئے

یہ لوگ اس کو بہت دور سمجھ رہے ہیں۔
مگر ہم اس کو قریب دیکھ رہے ہیں(کہ قیامت جیسی چیز)
چشم زدن(پلک جھپکنے) میں واقع ہوسکتی ہے۔
(وہ عذاب جس روز واقع ہوگا) اس روز آسمان پگھلے ہوئے تانبے کی طرح ہوجائے گا۔

اور پہاڑ دھنکے ہوئے اون کی طرح ہوجائیں گے۔
اور کوئی اچھے سے اچھا دوست اپنے دوست کی خبر نہ لےگا(کوئی کسی کا پرسان حال نہ ہوگا)۔

حالانکہ وہ ایک دوسرے کو دکھا ئے جائیں گے
اس روز مجرم چاہے گا کہ عذاب سے بچنے کے لئے اپنی اولاد کو

اور اپنی بیوی کو اور اپنے بھائی کو
اور اپنے خاندان کو جس میں وہ رہتا تھا(قریب ترین رشتہ دار جس کی ہمدردیاں اس کو حاصل تھیں)
اور جتنے آدمی روئے زمین پر رہتے ہیں، ان سب کو فدیے میں دیدے
اور یہ تد بیر اس کی نجات کا باعث ہوجائے ۔
ہر گز ہر گز ایسا نہ ہوگا

وہ تو جہنم کی بھڑ کتی ہوئی آگ ہوگی۔
وہ (سارے جسم کی) کھال ادھیڑنے والی ہوگی وہ اس شخص کو اپنی طرف بلائے گی جس نے دین حق سے رو گردانی کی تھی

اورمال جمع کیا تھا (یعنی راہ حق میں خرچ نہ کیا)
واقعی انسان کم حوصلہ پیداکیا گیا ہے۔
جب اسے تکلیف پہنچتی ہے توگھبرا اٹھتا ہے۔(آہ وزاری کرنے لگتا ہے)
اورجب اس کو خوش حالی نصیب ہوتی ہے توبڑا ہی بخیل اور خیر خیرات سے منع کرنے والا بن جاتا ہے (حقوق وواجبات بھی ادا نہیں کرتا)

سوائے ان نمازیوں کے جو ہمیشہ اہتمام کے ساتھ اپنی نمازیں ادا کرتے ہیں۔
قضا کی نوبت تک نہیں آنے دیتے۔

اور جن کے مال میں حصہ مقرر ہے۔

مانگنے والوں کے لئے بھی اورنہ مانگنے والوں کے لئے بھی

اور وہ جو یوم حساب کی تصدیق کرتے ہیں۔
اوراپنے پروردگار کے عذاب سے ڈرتے ہیں۔

انھیں یہ اندیشہ لاحق ہوتا ہے کہ کہیں ان کے اعمال کسی گناہ کی وجہ سے حبط نہ ہوجائیں۔
بے شک ان کے رب کا عذاب ہے ہی ایسا کہ کوئی اس سے بے خوف نہیں رہ سکتا۔

اور وہ جو اپنی شرم گاہوں کی حفاظت کرتے ہیں۔
سوائے اپنی بیویوں اوراپنی مملوکہ باندیوں کے

پس ان پر کسی قسم کی ملامت نہیں۔
پھر جو کوئی ان کے سوا اوروں کے خواستگار ہوں
توایسے ہی لوگ حدود الٰہی سے تجاوز کرنے والے ہیں۔

اور وہ جواپنی امانتوں اورعہدوپیمان کا پاس ولحاظ رکھتے ہیں۔

اور جو اپنی گواہیوں میں راست بازی پرقائم رہتے ہیں۔

اور وہ جو اپنی نمازوں کی حفاظت کرتے ہیں۔

یہی وہ لوگ ہیں جو عزت کے ساتھ جنت کے باغوں میں رہیں گے۔

ان کافروں کوکیا ہوگیا کہ وہ آپ کی طرف دوڑے چلے آرہے ہیں۔

دائیں سے اوربائیں سے، گروہ درگروہ۔

کیا ان میں سے ہر کوئی یہ توقع رکھتا ہے۔
کہ وہ نعمتوں بھری جنت میں داخل کردیا جائے گا۔
ہر گز نہیں ( جو لوگ حق بات تک سننا گوارہ نہیں کرتے اورحق کی آواز دبانا چاہتے ہیں، وہ کیسے جنت کے امیدوار ہوسکتے ہیں ؟)

ہم نے انھیں جس چیز سے پیدا کیا ہے وہ اس سے بخوبی واقف ہیں۔
مشرقوں اورمغربوں کے رب کی قسم کھاتا ہوں۔
بلاشبہ ہم اس بات پرقادر ہیں کہ
ان کی جگہ ان سے بہتر لوگ لے آئیں
اور ہم ایسا کرنے پرعاجز نہیں ہیں۔

توائے پیغمبر(ﷺ) انھیں اپنے باطل اور بیہودہ کھیل کود (کج بحثی) میں پڑا رہنے دیجئے۔

تا آں کہ وہ اس دن کوپہنچ جائیں جس کا ان سے وعدہ کیا گیا ہے۔

اس دن یہ اپنی قبروں سے نکل کر پکارنے والے کی طرف اس طرح دوڑے جارہے ہوںگے۔
گویا کہ وہ اپنے بتوں کے استھانوں کی طرف دوڑے جارہے ہوں۔

(بہ روز حشر) ان کی نگاہیں جھکی ہو ئی ہوں گی اور ذلت ان پر چھارہی ہوگی۔
یہی وہ دن ہے جس کا ان سے وعدہ کیا جاتا رہا ہے۔