سورة المومن

حٰ م حروف مقطعات ہیں ان کے معنیٰ بہ سند صحیح رسول اللہﷺ سے منقول نہیں ہیں۔

یہ کتاب(قرآن مجید) ایک نہایت ہی زبردست بڑے ہی جاننے والے اللہ تعالیٰ کی طرف سے نازل کی گئی ہے۔

(اہل ایمان کے) گناہوں کی پردہ پوشی کرنے والے (ہر توبہ کرنے والے کی) توبہ قبول کرنے والے

بغاوت (سرکشی پر) سخت ترین سزا دینے والے

لمبی پہنچ رکھنے والے (کوئی ان کی پہنچ سے باہر نہیں بڑے ہی طاقتور، بخشش وعطا فضل واحسان کے معنی بھی لئے جاتے ہیں)

اس اللہ تعالیٰ کے سوا کوئی معبود ومستعان نہیں۔

انجام کار تمام جن وانس محاسبہ وجزائے اعمال کے لئے اللہ ہی کی طرف پلٹ کرجانے والے ہیں۔

اللہ تعالیٰ کی تعلیمات کے بارے میں وہی لوگ جھگڑتے ہیں جو کافر ہیں، الٰہی تعلیمات قبول کرنا نہیں چاہتے۔

ان کافروں کا شہرمیں چلنا پھرنا(ان کے کاربار کا فروغ پانا) آپؐ کوکہیں اس فریب میں مبتلا نہ کردے کہ ( وہ کفر کے بعد بھی اللہ کی گرفت سے آزاد اورخوشحال زندگی گزاررہے ہیں۔ کفر کی سزا انھیں ضرورملے گی یہ ان کے لئے ایک مہلت ہے)

ان سے پہلے نوحؑ کی قوم بھی جھٹلاچکی ہے اوران کے بعد اورامتوں نے بھی پیغمبروں کی تکذیب کی تھی۔

اورہرامت نے اپنے رسولوں کے بارے میں یہی ارادہ کیا کہ انھیں اپنی گرفت میں لے۔

اور بے ہودہ شبہات پیدا کرکے جھگڑتے رہے تا کہ کسی طرح حق کوغلط ثابت کردکھائیں۔

بالآخر میں نے انھیں اپنی گرفت میں لیا۔

پھر میری سزا بھی کیسی سخت تھی؟

اورائے نبیﷺ اس طرح آپ کے رب کی یہ بات ان کافروں پر پوری ہوکر رہی کہ وہ سب جہنم میں داخل ہونے والے ہیں۔

وہ فرشتے جو عرش الٰہی کواٹھائے ہوتے ہیں اور جو اس کے گردوپیش رہتے ہیں۔

وہ اپنے رب کی حمد کے ساتھ تسبیح کرتے رہتے ہیں۔

اور اس پرایمان رکھتے ہیں۔

اورایمان لانے والوں کے لئے مغفرت کی دعائیں کرتے رہتے ہیں کہ۔

ائے ہمارے پروردگار آپ کی رحمت اورآپ کا علم ہر شئے پرگھیرا ہوا ہے۔

پس ان لوگوں کوبخش دیجئے جو (کفر وشرک سے) توبہ کرتے ہیں اور آپ کے (بتلائے ہوئے) راستے پرچلتے ہیں یعنی الٰہی تعلیمات کے مطابق عمل پیرا رہتے ہیں۔

اورانھیں دوزخ کی آگ سے بچائیے۔

ائے ہمارے پروردگار انھیں ہمیشہ ہمیشہ برقرار رہنے والی جنتوں میں داخل کیجئے، جن کا آپ نے ان سے وعدہ فرمایا ہے۔

اوران کے آباء واجداد اور ان کی بیویوں اوراولاد میں سے جو صالح ہوں (یعنی جنہوںنے اپنے عقیدہ وعمل کی اصلاح کرلی ہے) انھیں بھی ان کے ساتھ جنت میں داخل فرمادیجئے ۔

یقیناً آپ قادر مطلق اورحکیم ہیں۔(آپ کا حکم نہایت ہی حکیمانہ ہے)

اورانھیں برائیوں سے بچائیے۔

حق تعالیٰ! جس کوآپ نے قیامت کے دن کے شدائد سے بچالیا توآپ نے اس پربڑا ہی رحم فرمایا۔

اور یہی بڑی کامیابی ہے( اور یہی ہرانسان کی فطرت کا باطنی مطالبہ ہے)

جب کہ تمہیں ایمان کی طرف بلایا جارہا تھا اور تم اس سے گریز کرتے تھے۔

وہ جواب میں کہیں گے ائے ہمارے پروردگار آپ نے ہمیں دو دفعہ موت دی۔

اور دو دفعہ ہمیں زندہ کیا۔

ہم اپنے قصور کا اعتراف کرتے ہیں۔

کیا اب ہمارے یہاں سے نکلنے کی کوئی سبیل ہے۔
(ان سے کہا جائے گا کہ تم اس بدحالی سے کبھی نکل نہ سکوگے)

اس لئے کہ تم کوتوحید کی طرف یعنی اللہ تعالیٰ کے الٰہ واحد ہونے کے اقرار کے لئے بلایاگیا توتم نے (ماننے سے) انکار کردیا۔

اورشرک کی تعلیم دی گئی تواس پر فوری ایمان لے آئے!

اب فیصلہ اللہ بزرگ وبرتر کے ہاتھ ہے۔

اللہ وہی توہے جو تم کواپنی قدرت کی نشانیاں دکھاتا ہے۔

اورتمہارے لئے آسمان سے رزق نازل کرتا ہے۔

یعنی مینہ نازل کرتا ہے، جس سے پودے اگتے ہیں اناج پیدا ہوتا ہے (اللہ تعالیٰ کی ان نشانیوں میں) وہی شخص غور وفکر سے کام لیتا ہے جو رجوع الی اللہ ہوتاہے۔

پس ائے لوگو! (چھوٹی بڑی ہرحاجت اورہرمشکل میں) اخلاص کے ساتھ اللہ تعالیٰ ہی کوپکاروکیونکہ عبادت صرف اللہ تعالیٰ ہی کا حق ہے(حق اور سچائی تویہی ہے)

خواہ کافروں کوکتنا ہی ناگوار گزرے۔

اللہ عالی مرتبت صاحب عرش (کائنات کے فرماں روا ہیں )

اپنے بندوں میں سے جس بندہ پرچاہتے ہیں وحی نازل فرماتے ہیں۔

تا کہ وہ لوگوں کوقیامت کے (ہولناک) دن سے ڈرائے۔

جس دن سب لوگ اور وہ (اللہ کے سامنے) بہ یک وقت قبروںسے نکل آموجود ہوںگے۔

ان کی کوئی چیز اللہ تعالیٰ سے مخفی نہ رہے گی۔

(پوچھا جائے گا) آج بادشاہی کس کی ہے؟
اختیارات کا اصل مالک کون ہے؟

(سارا عالم پکار اٹھے گا) ساری فرماں روائی اللہ الٰہ واحد کی ہے۔

اس دن ہر شخص کو اس کے کئے کا بدل دیا جائے گا اس دن کسی پر ظلم نہیں کیا جائے گا۔

بے شک اللہ تعالیٰ بہت جلد حساب لینے والے ہیں ۔

(اور ائے نبیﷺ) اس دن سے ڈرائیے جوبالکل قریب آئے گا۔

جب کہ اس دن کی ہیبت سے کلیجے منہ کوآئیں گے۔

ظالموں(مشرکوں) کا کوئی دوست نہ ہوگا اور نہ کوئی سفارش کرنے والا ہوگا کہ اس کی بات مان لی جائے۔

اللہ تعالیٰ نگاہوں کی خیانت کوجانتے ہیں۔

اور جوکچھ دلوں میں پوشیدہ راز ہیں(انھیں بھی جانتے ہیں)

اوراللہ تعالیٰ ٹھیک ٹھیک فیصلہ کریں گے۔

اور وہ مشرکین جواللہ تعالیٰ کوچھوڑکر اپنے خود ساختہ معبودان باطل کو پکارتے ہیں وہ کسی چیز کا فیصلہ کرنے والے نہیں ہیں

بے شک اللہ تعالیٰ ہی سب کچھ سننے اور دیکھنے والے ہیں ۔

پھر وہ دیکھ لیتے کہ جو لوگ ان سے پہلے تھے(انکار حق کے نتیجہ میں) ان کا کیا ہی برا انجام ہوا۔

وہ ان سے زیادہ طاقت ور تھے(بڑی شان وشوکت رکھتے تھے)

اوران سے زیادہ آثار (قلعے اور اونچی اونچی عمارتیں) زمین پر چھوڑگئے۔

پھر اللہ تعالیٰ نے ان کوگناہوں کے سبب اپنی گرفت میں لیا( مبتلائے عذاب کیا)

اوراللہ تعالیٰ کے مقابلہ میں انھیں کوئی بچانے والا نہ تھا۔

اس طرح کی سزائیں انھیں اس لئے دی گئیں کہ ان کے پاس ان کے رسول نہایت ہی واضح دلائل کے ساتھ آتے رہے تھے۔

پھر بھی انہوں نے رسولوں کونہ مانا، بالآخر اللہ تعالیٰ نے انھیں اپنی گرفت میں لے لیا۔

بے شک اللہ تعالیٰ بڑے ہی طاقتور سخت ترین سزا دینے والے ہیں۔

اوریقیناً ہم نے موسیٰ کواپنی (قدرت اوراپنے الٰہ واحد ہونے کی) نشانیوں اورواضح معجزات

کے ساتھ فرعون ہامان اور قارون کے پاس بھیجا۔

انہوں نے (موسیٰؑ کو) جادوگر اورجھوٹا کہا

غرض کہ جب ہماری طرف سے ان کے پاس دین حق پہنچا۔
(بے درپے معجزات دکھائے گئے، حجت پوری کردی)

توانہوں نے کہا، جولوگ ان کے ساتھ ایمان لائے ہیں ان کے تمام لڑکوں کوقتل کردو۔

اوران کی لڑکیوں کوزندہ رہنے دو۔

اورکافروں کی ساری تدبیریں انھیں کی گمراہی کا باعث بنیں (انھیں کے لئے وبال جان ہوگئیں)

اورفرعون نے درباریوں سے کہا مجھے چھوڑو توسہی، میں موسیٰ کوقتل کئے دیتا ہوں۔ بچاؤ کے لئے وہ اپنے رب کوپکارتا ہی رہے۔

مجھے اندیشہ ہے کہ وہ تمہارے دین ہی کونہ بدل ڈالے یا ملک میں فساد برپا کردے۔

اورموسیٰ نے کہا میں نے اپنے اورتمہارے پروردگار کی پناہ لی ہے۔ ہر اس متکبر کے شر سے جویوم الحساب قیامت کے دن پریقین نہیں رکھتا (اللہ ہی میری حفاظت کرے گا)

اورفرعون ہی کے خاندان سے ایک (بااثر) مرد مومن نے جواپنا ایمان چھپائے رکھا تھا کہنے لگا۔

کیا تم ایسے شخص کوقتل کرنا چاہتے ہو جو کہتا ہے کہ میرا پروردگار اللہ ہے۔ اور وہ تمہارے رب کی طرف سے کھلی کھلی نشانیاں لے کر آیا ہے۔

اور اگر وہ جھوٹا ہے تواس کے (جھوٹ) کا وبال اسی پر پڑے گا

اگر وہ سچا ہے توجس عذاب کے واقع ہونے کا وہ تم کو یقین دلا رہا ہے۔ ہوسکتا ہے کہ وہ یا اس عذاب کا کوئی جزوتم پرواقع ہو ہی جائے۔

بے شک اللہ تعالیٰ حد سے گزرجانے والے جھوٹے کوہدایت نہیں دیتے۔

ائے میری قوم کے لوگو آج تمہیں ملک کی حکمرانی حاصل ہے اور ملک میں تم غالب ہو۔

اگر اللہ تعالیٰ کا عذاب ہم پر واقع ہوجائے توکون ہماری مدد کرنے والا ہے۔

فرعون نے کہا میں تمہارے لئے وہی بات پسند کرتا ہوں جومجھے مناسب نظرآتی ہے۔

اورمیں تمہیں وہی راہ دکھاتا ہوں جس میں بھلائی ہے۔

اور وہ شخص جو ایمان لایا تھا کہنے لگا، ائے میری قوم کے لوگو مجھے اندیشہ ہے کہ کہیں تم پر وہ دن نہ آجائے جو اس سے پہلے (انبیا علیہم السلام کی مخالفت کرنے اور انھیں تکلیف پہنچانے والی) امتوں پر آیا تھا۔

یعنی نوحؑ کی قوم اور قوم عاد وثمود اور وہ لوگ جوان کے بعد پیدا ہوئے، ان کی طرح تم بھی تباہ وبرباد ہوجاؤگے

اورواقعہ یہ ہے کہ اللہ تعالیٰ اپنے بندوں پرظلم کرنا ہی نہیں چاہتے ۔

اورائے میری قوم میں تمہارے متعلق اس دن کے عذاب سے ڈرتا ہوں جو بڑا ہی آہ و فغاں کا دن ہوگا۔

جس دن تم پیٹھ پھیر کربھاگوگے۔

اس روز تم کواللہ تعالیٰ کے عذاب سے کوئی بچانے والانہ ہوگا۔

اور جس کواللہ تعالیٰ ہی گمراہی میں پڑا رہنے دیں پھر اس کو کوئی ہدایت دینے والا نہیں۔

اوریقیناً اس سے پہلے یوسفؑ بھی تمہارے پاس کھلی کھلی نشانیوں کے ساتھ(پیام حق لے کر) آئے تھے۔

لیکن جو کچھ تعلیم انہوں نے تمہارے سامنے رکھی تم اس سے ہمیشہ شک وشبہ میں پڑے رہے۔

یہاں تک کہ جب وہ وفات پاگئے تو تم کہنے لگے کہ ان کے بعد اللہ تعالیٰ اب کسی اوررسول کوبھیجنے والے نہیں ہیں۔

اس طرح اللہ تعالیٰ حد سے گزرنے والے(دین حق میں) شک وشبہ پیدا کرنے والے کو اس کی اپنی گمراہی میں پڑا رہنے دیتے ہیں۔

یہ وہ لوگ ہیں جو اللہ تعالیٰ کے احکام میں بغیر اس کے کہ ان کے پاس

کوئی دلیل ہو جھگڑتے ہیں۔

اللہ تعالیٰ اوراہل ایمان کے نزدیک ان کا یہ رویہ نہایت ہی ناپسندیدہ ہے۔

اسی طرح اللہ تعالیٰ ہرمتکبر سرکش کے دل پرمہرلگادیتے ہیں۔
(اب ان کے ایمان لانے کی توقع نہیں کی جاسکتی)

فرعون نے کہا ائے ہامان میرے لئے ایک بلند عمارت بنوا تا کہ میں اس کے ذریعہ آسمانوں تک پہنچ جاؤں پھر میںموسیٰ کے خدا کو جھانک کردیکھ

لوں۔ اورمیں تواھیں (موسیٰ کو) جھوٹا خیال کرتا ہوں۔

اوراسی طرح فرعون کواس کے برے عمل اس کی نظرمیں (انتقاماً) اچھے کر دکھائے گئے۔ اور وہ راہ راست سے روک دیا گیا

ائے میری قوم یہ دنیا کی زندگی او راس کے فائدے عارضی ہیں۔

اورآخرت ہی ہمیشہ ہمیشہ کے قیام کی جگہ ہے۔

جو کوئی برا کام کرے گا اس کا ویسا ہی بدلہ پائے گا۔

اور جو نیک عمل کرے خواہ وہ مرد ہویا عورت بشرطیکہ مومن ہو تو ایسے لوگ جنت میں داخل ہوں گے۔

جہاں انھیں بے حساب وبے شمار رزق دیا جائے گا۔

ائے میری قوم کے لوگو آخر یہ کیا بات ہیکہ میں تم کونجات کی طرف بلاتا ہوں

اور تم مجھ کو جہنم کی آگ کی طرف بلاتے ہو۔

تم مجھے بلاتے ہو تا کہ میں اللہ تعالیٰ کے الٰہ واحد معبود ومستعان ہونے کا انکار کروں۔

اوراس کے ساتھ شرک کروں جس کے جواز میں کوئی ثبوت یا دلیل علمی نہیں ہے۔

اورمیں تو تمہیں ایک بڑے زبردست بخشنے والے (اللہ الٰہ واحد) کی طرف بلاتا ہوں۔

یقیناً تم جس غیر اللہ کی (عبادت کی) طرف بلاتے ہو، وہ نہ تودنیا ہی میں پکارے جانے کے قابل ہے اورنہ آخرت میں۔

اور ہم کوتو(محاسبہ اعمال کے لئے) اللہ تعالیٰ ہی کی طرف لوٹنا ہے۔

او رجو لوگ حدود وبندگی سے نکل جاتے ہیں( اللہ تعالیٰ کی دی ہوئی نعمتوں کا استعمال برائی کے لیے کرتے ہیں) وہی جہنمی ہیں

جوبات میں تم سے کہہ رہا ہوں تم آگے چل کراسے یاد کروگے اورمیں اپنے معاملہ کواللہ تعالیٰ کے تفویض کرتا ہوں۔

بے شک اللہ تعالیٰ بندوں کو دیکھ رہے ہیں (بندوں کے احوال اللہ تعالیٰ کی نظروں میں ہیں)

پس اللہ تعالیٰ نے اس (مرد مومن) کوان کے مکروفریب اوربرائیوں سے بچالیا۔

فرعون اوراس کے ساتھیوں (اور اس کی پوری قوم) کوایک بدترین عذاب نے اپنی لپیٹ میں لے لیا۔

دوزخ کی آگ ہے جسکے سامنے وہ صبح وشام لائے جاتے ہیں(جسے دیکھ کر وہ خوف کھاتے رہتے ہیں کہ اس میں انھیں ہمیشہ ہمیشہ کیلئے جلتے رہنا ہے۔

اور جس دن قیامت قائم(برپا) ہوگی (حکم ہوگا) فرعون آل فرعون (اور اس کی قوم کو) سخت ترین عذاب میں داخل کردو۔

اور( وہ بھی کیسا وقت ہوگا) جب کہ کفار دوزخ میں ایک دوسرے سے جھگڑنے لگیں گے۔ ضعیف الاعتقاد لوگ اپنے متکبر رہنماؤں، پیشواؤں سے طنزا کہیں گے

کہ ہم (دنیا میں تمہاری غلط تعلیم پراعتماد کرتے ہوئے) تمہاری اتباع کیا کرتے تھے توکیا تم دوزخکا کچھ عذاب ہم سے دور کرسکتے ہو؟

ان کے متکبر (رہنما) کہیںگے ہم سبھی اس (دوزخ) میں پڑے ہوئے ہیں (کون کس کی مدد کرسکتا ہے)

یقیناً اللہ تعالیٰ اپنے بندوں کے درمیان فیصلہ کرچکے (اب اس میںکمی بیشی کا کسی کواختیار نہیں)

اوریہ دوزخ میں پڑے ہوئے لوگ جہنم کے نگران کاروں سے کہیں گے۔

اپنے رب سے کہو کہ ایک دن تو ہم سے عذاب ہلکا کردے۔

وہ کہیں گے کیا تمہارے پاس تمہارے پیغمبر واضح دلائل لے کر آئے نہ تھے۔

وہ کہیں گے، ہاں آتے تورہے تھے۔

فرشتے کہیں گے پھر تواب تم دعائیں کرتے ہی رہو۔
(سفارش ہمارا کام نہیں، ہم توعذاب پر مقرر ہیں)

اور کافروں کی دعائیں (اس روز) اکارت جانے والی لاحاصل ہوں گی۔

اس روز ظالموں (مشرکوںاور کافروں) کی معذرت کچھ کام نہ آئے گی۔

اور ان کے لئے لعنت ہے اور ان کے لئے بدترین مقام ہے

اور ہم نے موسیٰ کوہدایت (کی کتاب توراۃ) دی اور بنی اسرائیل کوکتاب کا وارث بنایا۔

جس میں سمجھ بوجھ سے کام لینے والوں کے لئے ہدایت اور نصیحت تھی۔

پس (ائے نبیﷺ) آپ (مخالفین اسلام کی) اذیت رسانیوں پرصبر کیجئے۔ بے شک اللہ کا وعدہ سچا ہے (اللہ کی مدد آکر رہے گی)

اوراستغفار کیجئے صبح وشام اپنے رب کی حمد کے ساتھ تسبیح کیا کیجئے۔

جو لوگ اللہ تعالیٰ کی آیتوں کے بارے میں کسی دلیل کے بغیر (اس طرح) جھگڑتے ہیں گویا ان کے پاس دلیل ہے۔
(جوکہتے ہیں یہ اللہ کا کلام نہیں ہے)

ان کے سینوں میں کبروغروربھرا ہوا ہے (وہ اپنے کوایک بڑی شخصیت سمجھتے ہیں، نبی کے مقابلہ میں نبوت جیسے عہدے کا اپنے کواہل سمجھتے ہیں)

مگروہ اس سعادت کوپہنچنے والے نہیں ہیں۔

آپ (کفار مکہ کے مقابلے میں) اللہ کی پناہ مانگئے (وہ آپ کیلئے کافی ہے)

بے شک وہی سننے والا اور (سب کچھ) دیکھنے والا ہے ۔

آسمانوں اورزمین کا پیدا کرنا، انسانوں کو(موت کے بعد) پیدا کرنے کی بہ نسبت یقینا ًبہت زیادہ بڑا کام ہے

لیکن اکثر لوگ(اتنی بات بھی) نہیں جانتے۔

اندھا اوربینا دونوں یکساں نہیں ہوسکتے۔

اورجو لوگ ایمان لائے اور اچھے کام کئے اورجوبدکار ہیں وہ باہم برابر نہیں ہوسکتے۔

تم میں بہت ہی تھوڑے ہیں جوغور وفکر سے کام لیتے ہیں۔

بے شک قیامت آنے والی ہے، جس کے آنے میں کوئی شک نہیں ہے۔

لیکن اکثر لوگ اس بات پریقین نہیں رکھتے۔

ائے لوگو! تمہارے پروردگار نے ارشاد فرمایا ہے کہ تم مجھ سے دعا کرو، مجھے پکارو۔

میں تمہاری دعا قبول کرتا ہوں۔

جو لوگ از راہ تکبر میری عبادت سے کتراتے ہیں وہ عنقریب ذلیل وخوار ہوکر جہنم میں داخل ہوں گے۔

واقعہ یہ ہے کہ اللہ تعالیٰ لوگوں پربڑا ہی فضل فرمانے والے ہیں لیکن اکثر لوگ اللہ تعالیٰ کا شکر ادا نہیں کرتے۔

یہی اللہ تمہارا پروردگار ہے جو ہر شئے کا پیدا کرنے والا ہے۔

اس کے سوا کوئی معبود (ومستعان) نہیں ۔

پھر تم( کس بنا پر اللہ تعالیٰ کے الہ واحد ہونے سے) پھرے جارہے ہو۔

اسی طرح وہ سب لوگ بہکائے جاتے رہے۔

جواللہ تعالیٰ کی آیات کا انکار کرتے تھے۔

وہ اللہ ہی تو ہے جس نے تمہارے لئے زمین کوجائے قرار بنایا (ورنہ تم اس پر ٹھہر بھی نہ سکتے تھے)

اور(گنبد کی طرح) آسمان کا بلند چھت بنایا۔

اور تمہاری صورتیں بنائیں اوربڑی ہی عمدہ بنائیں۔

اورپاکیزہ چیزوں کوتمہارا رزق بنایا

یہی تواللہ ہے جوتمہارا پروردگار ہے۔

پس بڑا ہی بابرکت ہے اللہ تعالیٰ (جوایسی قدرتیں رکھتا ہے) اور جو (کسی کواپنا شریک کاربنائے بغیر اپنی قدرت سے) سارے عالم کی پرورش فرماتا ہے۔

وہ زندہ ہے۔ اس اللہ کے سوا کوئی عبادت واستعانت کے قابل نہیں۔

(ہر مشکل وحاجت میں) پورے اخلاص وجذبۂ اطاعت گزاری کے ساتھ اسی(اللہ) کو پکارو، خالص عبادت اسی کا حق ہے۔

ہر طرح کی تعریف اللہ تعالیٰ ہی کیلئے سزاوار ہے جو سارے عالم کا پروردگار ہے۔

ائے نبیﷺ ان سے کہئے مجھے ان لوگوں کی عبادت سے منع کیا گیا ہے جنہیں تم اللہ تعالیٰ کے سوا مدد کے لئے پکارتے ہو۔

جبکہ میرے پاس میرے رب کی طرف سے نہایت ہی واضح تعلیم پہنچ چکی ہے۔

اورمجھے حکم دیا گیا ہے کہ میں اللہ رب العلمین ہی کے آگے جھکا رہوں (اور خالص اللہ تعالیٰ ہی کی عبادت کیا کروں)

وہ اللہ ہی توہے جس نے تم کوپہلی دفعہ مٹی سے پیدا کیا پھر نطفہ سے، پھر خون کے لوتھڑے سے۔

مختلف مراحل سے گزار کر، بچہ کی شکل میں ماں کے پیٹ سے نکالا۔ پھر تمہیں جوانی کی عمر کو پہنچایا۔ پھر تم بڑھاپے کی عمر کوپہنچتے ہو۔

اور تم میں سے کوئی ایسی عمر کوپہنچنے سے قبل ہی مرجاتا ہے۔

(منشاء الٰہی یہ ہے کہ) تم اپنی مقررہ مدت پوری کرلو۔

(یہ ساری قدرتیں اس لئے بیان کی گئیں ہیں کہ) تم اللہ تعالیٰ کی قدرت کاملہ کوسمجھو (اور قیامت کے دن زندہ کئے جانے کوتسلیم کرو)

اللہ وہی توہے جوجلاتا اورمارتا ہے۔ یہ نظام حیات وممات اسی کے اختیار میں ہے۔

پھر جب اللہ تعالیٰ کسی کام کاارادہ فرماتے ہیں تو

بس کن کہہ دیتے ہیں وہ اسی وقت ہوجاتا ہے۔

یہ کدھر بھٹکائے جارہے ہیں۔

جن لوگوں نے اس کتاب(قرآن مجید) کوجھٹلایا۔

اور ان کتابوں کو بھی جو ہم نے اپنے رسولوں کے ساتھ بھیجی تھیں، وہ عنقریب جان لیں گے۔

جب ان کی گردنوں میں طوق اورزنجیریں ہوں گی انھیں گھسیٹتے ہوئے کھولتے پانی میں لایا جائے گا۔

پھر وہ دہکتی ہوئی آگ میں جھونک دیئے جائیں گے۔

پھر ان سے پوچھا جائے گا۔ کہاں ہیں وہ جنہیں تم اللہ تعالیٰ کے سوا شریک بناتے تھے۔ (جن کے بارے میں تمہارا عقیدہ تھا کہ وہ تم کواللہ تعالیٰ کے عذاب سے بچالیں گے)

وہ جواب دیں گے(اب) وہ سب ہمارے ذہن سے نکل گئے (یعنی اب ہم ان کے معتقد نہیں رہے)

بلکہ ہم تو اس سے پہلے کسی چیز کو پکارتے ہی نہ تھے

اسی طرح اللہ تعالیٰ کافروں کوبھول بھلیوں میں یعنی غلطیوں میں مبتلا رکھتے ہیں۔

(ان سے کہا جائے گا) تمہارا یہ انجام اس لئے ہوا کہ تم دنیا میں (حق کے مقابلہ میں) اپنے غلط عقیدۂ نجات کی بنا پر خوش تھے۔

اور اس وجہ سے بھی کہ تم اپنی باطل پرستی پراکڑتے اتراتے بھی تھے۔

(حکم ہوگا) جہنم کے دروازوں میں داخل کردو، ان کوہمیشہ ہمیشہ اسی میں رہنا ہے۔

پس غرور وتکبر کرنے والوں کا کیا ہی برا ٹھکانہ ہے۔

(کافروں کی اذیت رسانیوں پر) چندے صبر کیجئے، بے شک اللہ تعالیٰ کا وعدہ سچا ہے (پورا ہوکر رہے گا)

پھر اگر ہم آپ کواس عذاب کا کچھ حصہ دکھادیں جس کا ہم نے ان سے وعدہ کیا ہے۔

یا (اس عذاب کے آنے سے پہلے ہی) اگر ہم آپ کو دنیا سے اٹھالیں، (اس سے کوئی فرق نہیں پڑتا)، انھیں توہماری ہی طرف لوٹ کرآنا ہے(اپنے کئے کا بھرپور بدل پانا ہے)

اور ائے نبیﷺ آپ سے پہلے ہم بہت سے رسول بھیج چکے ہیں۔

ان میں سے ہم نے بعض کا ذکر آپ سے کیا ہے اور ان میں بعض ایسے بھی ہیں جن کے حالات ہم نے آپ سے بیان نہیں کئے

اور کسی رسول کوبھی یہ اختیار نہ تھا کہ وہ اذن الٰہی کے بغیر کوئی معجزہ لے آئے۔

پھر جب اللہ تعالیٰ کا حکم آپہنچا توانصاف کے ساتھ فیصلہ کردیا گیا۔

اور اس وقت اہل باطل (انتہائی) خسارہ میں پڑگئے۔

اوران میں سے (بعض قسم ایسے بھی ہیں) جن کا گوشت تم کھاتے ہو۔

اورتمہارے لئے ان میں اوربھی بہت سے فائدے ہیں۔ دودھ، گھی، دہی لسی، کھویا، پنیر، اون، چرم، ہڈی، گوبر، وغیرہ۔

اور انھیں اس لئے بھی پیدا کیا تا کہ ان پر سوار ہوکرجہاں چاہو جا سکو۔

اورتم ان پر اورکشتیوں پر سوار کئے جاتے ہو،

اور تم کو اپنی قدرت کے کئی ایک مناظر دکھاتے ہیں۔

پھرتم اللہ تعالیٰ کی کن کن قدرتوں کا انکار کروگے۔

کیا انہوں نے ملک میں چل پھر کرنہیں دیکھا ؟

وہ(کاش ! چشم بصیرت سے) دیکھتے کہ جو لوگ ان سے پہلے تھے، ان کا کیا ہی براانجام ہوا(شرک وکفر کے نتیجہ میں کس طرح ان کی بستیاں الٹ دی گئیں۔ انھیں کس طرح تباہ وتاراج کردیا گیا۔

وہ ان سے زیادہ طاقت وراورزمین پر بڑے بڑے آثار (فلک بوس عمارتیں) چھوڑگئے۔

پس جو کچھ انہوں نے کیا وہ ان کے کچھ کام نہ آیا۔

پھر جب ان کے پیغمبر ان کے پاس واضح دلائل کے ساتھ آئے، تو

وہ اپنے ان (دنیاوی) علوم وفنون پر جوانھیں حاصل تھے اترانے لگے۔(اور علم حق کی طرف توجہ نہ کی)

جس عذب کا مذاق اڑارہے تھے وہ ان پر واقع ہوکر رہا ۔

جب انہوں نے (دنیاوی زندگی میں) ہمارا عذاب دیکھا

توکہنے لگے، اب ہم اللہ الٰہ واحد پر ایمان لائے۔

اورہم ان تمام معبودان باطل سے منکر ہوگئے جنہیں ہم نے اللہ کے ساتھ شریک بنائے رکھا تھا۔
(ان کے بے اختیار ہونے کے قائل ہوگئے)

جب وہ ہمارے عذاب کودیکھ چکے توان کا ایسا ایمان لانا ان کے لئے نفع بخش نہ ہوا۔

یہی سنت الٰہی ہے(اللہ تعالیٰ کا مقررہ قانون ہے) جو اس کے بندوں

اور وہاں (آخرت میں) کافر بڑے ہی نقصان میں رہیں گے۔