سورة الملك

بڑا ہی با برکت ہے وہ(اللہ ) جس کے ہاتھ میں کائنات کی بادشاہی اور حکمرانی ہے
وہ ہر چیز پر قادر

جس نے موت وحیات کو پیدا کیا تاکہ تمہارا امتحان لیا جائے کہ تم میں سے کون (اخلاص کے ساتھ) اچھے عمل کرتا ہے
اور وہ زبر دست بخشنے والا بھی ہے۔

جس نے سات آسمان طبقہ وار بنائے
تم اللہ رحمٰن کی تخلیق میں کسی قسم کے بے ربطی نہ پاؤ گے

پس (اللہ رحمٰن کی اس صفت پر) ایک نظر ڈال کر دیکھو
کیا تمہیں کوئی نقص نظر آتا ہے؟
مکرر بہ نظر غائر دیکھو
تمہاری نگاہ تمہارے پاس ناکام لوٹ آئے گی(یعنی تم کو اس میںکوئی نقص یاخامی نظر نہ آئے گی)

اور ہم نے آسمانِ دنیا کی روشن چراغوں(ستاروں)سے مزین کیا ہے

اور ہم نے انھیں شیاطین کو مار بھگانے کا ذریعہ بھی بنایا
ہم نے ان شیاطین کے لئے دہکتی آگ کا عذاب مہیا کردیا ہے۔

یہ ان لوگوں کے لئے بھی ہے جو اپنے پر وردگار(کے الٰہ واحد معبود ومستعان ہونے) کا انکار کرتے ہیں، ان کے لئے بھی، ہاں دوزخ کا عذاب ہے
وہ تو نہایت ہی بُرا ٹھکانہ ہے۔

جب وہ اس میں پھینکے جائیں گے تو اس کے دھاڑنے کی ہولناک آوازیں(جہنم کا چیخنا چلّانانہایت ہی کر یہہ آواز میں) سنیں گے اور وہ جوش مارتی ہوگی
(ایسا معلوم ہوگا) گو یاکہ وہ غصّہ کے مارے پھٹ پڑے گی جب بھی (کافرو مشرک) اس میں فوج درفوج(کثرت سے) ڈالے جائیں گے تو

اس کے نگران کار فرشتے ان سے پو چھیںگے، کیا تمہارے پاس (نافرمانی کے ان نتائج سے) خبر دار کرنے والا کوئی نہیں آیا تھا؟
وہ کہیں گے ہاں، ڈرانے(خبر دار کرنے) والا ہمارے پاس ضرور آیا تھا
مگر ہم نے اسے جھٹلا دیا، اور کہا اللہ تعالیٰ نے کچھ بھی نازل نہیں کیا (کوئی احکام،کتب وصحافی نہیں بھیجے)
(دراصل) تم ہی بڑی غلطی میں پڑے ہوئے ہو۔

اور وہ کہیں گے کاش! ہم سنتے اور سمجھتے تو
اہل دوزخ میں(شامل ) نہ ہوتے۔
اسی طرح وہ اپنے گناہوں کا خود اعتراف کریں گے
پس لعنت ہے ان دوزخیوں پر

جو لوگ اپنے پر وردگار کو دیکھے بغیر ڈرتے ہیں۔(یعنی کوئی کام مرضی الٰہی کے خلاف نہیں کرتے)
ان کے لئے بخشش(مغفرت) ہے اور بڑا اجر ہے۔

(اللہ تعالیٰ کی وسعت علمی کی شان یہ ہے کہ)تم اپنی کسی بات کو نہایت ہی آہستہ کہو یا پکارکر(اللہ تعالیٰ کیلئے یکساں ہے)

یقیناً اللہ دلوں کے اندر کا حال جانتے ہیں۔
کیا وہی نہ جانے گا جس نے پیدا کیا ہے
وہ نہایت ہی باریک بین اور ہر چیز سے باخبر ہے۔

وہی تو ہے جس نے تمہارے لئے زمین کو تابع کر رکھا ہے (رہنے سہنے کے قابل بنایا ہے)
پس اس کے راستوں پر چلو پھرو (یعنی زندگی کے کاروبار انجام دینے کے لئے اس پر چلو پھرو)
اوراللہ تعالیٰ کا دیا ہوا رزق کھاؤ

(یہ یقین رکھو کہ مرنے کے بعد) دوبارہ زندہ ہو کر(محاسبۂ اعمال کے لئے) اُسی کے پاس جاناہے۔
کیا تم اس سے بے خوف ہوگئے ہو جو آسمان میں ہے

کہ وہ تم کو زمین میں دھنسا دے
اور یکا یک وہ جھکولے کھانے لگے۔
کیا تم اس سے بے خوف ہوگئے ہو جو آسمان میں ہے کہ وہ پتھر اؤ کرنے والی تیز و تند ہوائیں بھیج دے (اور تمہیں ہلاک کردے)

پھر تم عنقریب جان لوگے میرے تنبیہ کیسی ہوتی ہے۔
اور ان سے پہلے کے لوگوں نے بھی جھٹلا یا تھا

دیکھ لوکہ پھر میری گرفت کیسی سخت تھی(ایسی کہ کسی نے دیکھا تھا نہ سنا تھا)
کیا یہ لوگ اپنے اوپر اڑنے والے پرندوں کو نہیں دیکھتے جو پروں کو پھیلاتے اور سکیڑتے ہیں

رحمٰن کے سوا انھیں کون تھام رکھا ہے؟

بے شک وہی (اللہ) ہر چیز کا نگہبان ہے۔
(بھلا بتاؤ تو سہی) آخر وہ کون سا لشکر تمہارے پاس ہے جو رحمٰن کے مقابلے میں تمہارا احمایتی بن کر مدد کرسکتا ہو؟
یقیناً کافر(اپنے معبود انِ باطل کی نسبت ایسا خیال رکھتے ہوئے) دھوکے میں ہیں۔

اگر الر حمٰن (یعنی اللہ تعالیٰ) اپنا رزق روک لے تو پھر وہ کون ہے جو تمہیں رزق دے سکتا ہے؟
دراصل یہ لوگ سر کش اور دین حق سے گریز پر اڑے ہوئے ہیں۔
(بھلا سو چوتو سہی) جو شخص اوندھے منہ چل رہا ہو (گر گر پڑتاہے) تو کیا وہ صحیح راہ پانے والا ہوسکتا ہے؟
یا وہ جو سیدھی راہ چل رہا ہو ۔

ائے نبی ﷺ، کہئے(اللہ) وہی تو ہے جس نے تم کو پیدا کیا(تمہاری نشوو نما کی، تمہاری بقا کا سامان کیا، جو چیزیں زمین میں ہیں وہ سب تمہارے لئے پیدا کیں)

اور تم کو سننے اور دیکھنے کی طاقت بخشی، اور سوچنے سمجھنے والے دل دیئے(تاکہ حق وباطل میں تمیز کرو، اور غلط باتیں جو پہلے سے تمہارے دماغ میں بیٹھی ہوئی ہیں اُن پر اڑے نہ رہو)

مگر تم کم ہی شکر کرتے ہو ۔

ائے نبی ﷺ، کہہ دیجئے، اللہ وہی تو ہے جس نے تم کو زمین میں پھیلایا
اور بالآخرتم اسی کی طرف لوٹا ئے جاؤ گے۔

اوروہ( کافر)پوچھتے ہیں، اگر تم سچے ہو تو بتاؤ یہ وعدہ کب پورا ہوگا؟

کہیئے، اس کا علم تو اللہ ہی کے پاس ہے
اور یقیناً میں تو صاف صاف خبر دارکرنے والاہوں۔
پھر جب یہ اس کو قریب سے دیکھ لیں گے تو ان سب کے چہرے (ہیبت و شدّت غم کے مارے) سیاہ وبد وضع ہوجائیں گے جنھوں نے انکار کیا ہوگا
اور اس وقت ان سے کہاجائے گا، یہ وہی تو ہے جس کے لئے تم مطالبہ اورتقاضہ کر رہے تھے۔

ائے نبی ﷺ، ان سے کہیئے،کیا تم نے کبھی یہ بھی سوچا کہ اللہ تعالیٰ مجھے ہلاک کردے اور انھیں بھی جو میرے ساتھ ہیں یا ہم پر رحم فرمائے (تو تم کو اس سے کیا حاصل ہو گا)

مگر آخرت کے درد ناک عذاب سے کافروں کو کون بچائے گا۔

کہئے وہ الر حمٰن ہے، اسی پر ہم ایمان لائے ہیں۔
اور ہم اسی پر بھروسہ رکھتے ہیں
تم بہت جلد جان لوگے کہ کون صریح گمراہی میں پڑاہوا تھا ۔

ان سے کہیئے کبھی تم نے یہ بھی سوچا ہے کہ اگر تمہارے
کنو ؤں کا پانی زمین میں نیچے اتر جائے
تو پھر کون ہے جو تمہارے لئے میٹھے پانی کے چشمے نکال لائے گا؟