سورة مريم

یہ حروف مقطعات ہیں ان کے کوئی معنی بہ سند صحیح رسول اللہﷺ سے منقول نہیں ہیں۔

(محمدﷺ) یہ آپ کے پروردگار کی رحمت کا ذکر ہے جواللہ تعالیٰ نے اپنے بندہ ذکریا پر کی تھی۔

جب کہ اس نے اپنے پروردگار سے دل ہی دل میں دعا کی تھی۔

کہا ائے پروردگار بڑھاپے کی وجہ سے میری ہڈیاں کمزور ہوگئی ہیں اور میرے سر کے بال (اس قدر سفید ہوگئے ہیں کہ) ان میں چمک پیدا ہوگئی ہے۔

ائے میرے پروردگار میں آپ سے مانگ کرمحروم نہیں رہا ۔

اورمجھے اندیشہ ہے کہ میرے بعد میرے ورثا( اشاعت حق کا) کام انجام نہیں دیں گے) اورمیری بیوی بانجھ ہے

لہٰذا (اللہ تعالیٰ ) آپ مجھے اپنے پاس سے ایک وارث (بیٹا) عطا کیجئے۔

جومیرے علم کا وارث بنے اورمیرے اوریعقوبؑ کے خاندان کا بھی وارث بنے۔

اور ائے میرے پروردگار اس کواپنا پسندیدہ بندہ بنائیے۔

ائے ذکریاؑ ہم تم کوایک لڑکے کی خوشخبری سناتے ہیں جس کا نام یحییٰ ہوگا۔

اس سے پہلے ہم نے اس نام کا کوئی شخص پیدا نہیں کیا۔

ذکریا نے عرض کیا ائے میرے پروردگار مجھے لڑکا کیسے ہوگا ؟

جب کہ میری بیوی بانجھ ہے اورمیں بڑھاپے کی انتہا کوپہنچ چکا ہوں۔

فرشتے نے کہا بس ایسی ہی موجودہ حالت میں لڑکا پیدا ہوگا۔

آپ کے پروردگار نے فرمایا، اس طرح پیدا کرنا میرے لیے آسان ہے۔

اورمیں اس سے پہلے تم کوپیدا کرچکا ہوں اورتم کوئی چیز نہ تھے (تمہارا وجود ہی نہ تھا)

ذکریاؑ نے عرض کیا ائے میرے رب میرے لیے کوئی نشانی مقرر فرما دیجئے

اللہ تعالیٰ نے فرمایا تمہارے لیے نشانی یہ ہے کہ (تندرست رہنے کے باوجود ) تین رات دن لوگوں سے بات نہ کرسکوگے۔

پھرذکریاؑ عبادت گاہ سے اپنی قوم کی طرف آئے اورانھیں اشاروں سے ہدایت کی کہ صبح وشام اللہ تعالیٰ کی تسبیح کرتے رہیں۔

(یحییٰ ؑ پیدا ہوئے بچپن ہی میں اللہ تعالیٰ نے آپ سے مخاطبت فرمائی) ائے یحییٰؑ کتاب توراۃ کومضبوطی کے ساتھ پکڑے رہو۔

اورہم نے انھیں لڑکپن ہی میں توراۃ کا فہم اور دین کی سمجھ عطا کی تھی

اوراپنی مہربانی سے انھیں نرم دل اورپاکیزہ اخلاق عطا کیے اوروہ بڑے ہی پرہیز گار تھے۔

اوروہ اپنے والدین کے بڑے ہی خدمت گذار تھے، سرکش ونافرمان نہ تھے۔

ان پرسلامتی ہے جس دن وہ پیدا ہوئے اورجس دن وہ انتقال کریں گے اورجس دن وہ زندہ کرکے اٹھائے جائینگے، ان پر کوئی گرفت نہ ہوگی۔

اپنے اور لوگوں کے درمیان پردہ ڈال لیں۔

پھر اس وقت ہم نے ان کی طرف اپنا ایک فرشتہ (جبرئیلؑ) بھیجا وہ ان کے سامنے ایک (خوبصورت) نوجوان انسان کی شکل میں ظاہر ہوا۔

(ایک اجنبی نوجوان کودیکھ کرگھبراگئیں) کہا میں تیرے شر سے رحمٰن کی پناہ مانگتی ہوں اگر واقعی توپرہیزگار انسان ہے (تومجھ پر دست درازی نہ کرے گا)

فرشتے نے کہا میں تمہارے پروردگار کا بھیجا ہوا ہوں۔

تا کہ تمہیں ایک پاکیزہ(فطرتا نیک سرشت) لڑکے کی بشارت دوں ۔

مریمؑ نے کہا مجھے لڑکا کیونکر ہوگا جب کہ کسی انسان نے مجھے ہاتھ تک نہیں لگایا اورنہ میں بدکار ہوں۔

فرشتہ نے کہا یوں ہی (مرد کے بغیر) ہوجائے گا،

تمہارے رب نے فرمایا، اس طرح پیدا کرنا مجھ پر آسان ہے۔
بلا اسباب ظاہری یا تدریجاً بہ سلسلہ اسباب جیسا بھی حکم ہوتا ہے اس کی تعمیل ہوجاتی ہے۔

اورہم اپنی مہربانی سے اس کو لوگوں کیلئے(اپنی قدرت کی) نشانی بنادینگے۔

اوریہ بات (اس طرح مرد کے بغیر لڑکے کا پیدا ہونا اللہ تعالیٰ کے پاس) طے شدہ ہے۔

غرض وہ (حاملہ ہوگئیں) اس کواٹھائے ہوئے (حمل کی مدت پوری کی) پھر (جب وضع حمل کا وقت قریب آیا تو) تنہا اپنے لوگوں سے دورپہاڑ کے پیچھے جنگل میں چلی گئیں۔

پس جب درد زہ شروع ہوا تو (بے چینی کی حالت میں) ایک کھجور کے درخت کی طرف آئیں۔

کہنے لگیں کہ کیا ہی اچھا ہوتا کہ میں مرگئی ہوتی نیست ونابود ہوگئی ہوتی، کسی کویاد بھی نہ رہتی (بھولی بسری ہوجاتی)

تب جبرئیل نے ان کے قدموں کی جانب سے انھیں آواز دی (احتراماً سامنے نہ آئے کہا) آپ حزن وملال میں مبتلا نہ ہوں۔

آپ کے رب نے آپ کے نیچے کی طرف (پائتیں) چشمہ جاری کردیا ہے

اوراس کھجور کے تنے کوپکڑکراپنی طرف ہلاؤ۔

آپ پرتازہ کھجوریں گر پڑیں گی۔

ان کھجوروں کوکھاؤ اورپانی پیو اور اپنے نو مولود لڑکے کو دیکھ کر اپنی آنکھیں ٹھنڈی کرو۔

پھر آپ انسانوں میں سے کسی ایک کوبھی دیکھیں

تواشارۃ کہہ دینا، میں نے رحمٰن کے لیے روزہ کی نذرمانی ہے

میں آج ہرگز کسی انسان سے بات نہیں کروں گی۔

پھر وہ اس (بچہ) کوگود میں لیے اپنی قوم میں آئیں۔

قوم نے کہا ائے مریم تونے بہت ہی برا کام کیا۔

ائے ہارونؑ کی بہن تمہارے باپ کوئی برے آدمی نہ تھے

نہ تمہاری ماں بدکار تھی۔

پس مریمؑ نے بچہ کی طرف اشارہ کیا(مطلب یہ تھا کہ بچہ اس کا جواب دیگا)

لوگوں نے کہا ہم اس گود کے (دودھ پیتے) بچہ سے کیسے بات کرسکتے ہیں ؟

بچہ نے کہا میں اللہ کا بندہ ہوں، اللہ نے مجھے کتاب دی اور مجھ کونبی بنایا۔

اورمجھ کوبرکت والا بنایا جہاں بھی میں رہوں۔

اورمجھ کونماز وزکوۃ کا حکم دیا جب تک کہ میں زندہ رہوں۔

اورمجھے اپنی ماں کا محسن وتکریم کرنے والا بنایا، مجھے سرکش وبدبخت نہیں بنایا۔

اورسلامتی ہے مجھ پر جس دن میں پیدا ہوا اور جس دن میں مروں گا

اورجس دن میں زندہ اٹھایا جاؤں گا مجھ پرکسی قسم کی گرفت نہ ہوگی۔

یہ ہیں عیسیٰ ابن مریمؑ (ان کی پیدائش کےصحیح واقعات یہی ہیں)

یہی بات سچی ہے جس میںلوگ (بلاوجہ) جھگڑتے ہیں۔

اللہ تعالیٰ کے شایان شان نہیں کہ کسی کواپنا بیٹا بنائے (اورا پنی فرمانروائی میں شریک کرے) اس طرح کے عجز سے اللہ تعالیٰ پاک اورمنزہ ہیں۔

(اللہ تعالیٰ کی قدرت کا تویہ عالم ہے) جب کسی تخلیق وغیرہ کا ارادہ کرتے ہیں توکہتے ہیں ہوجا، توفوراً ہی وہ سب کچھ ہوجاتا ہے، وجود میں آجاتا ہے۔

(حضرت عیسیٰؑنے کہا) بلاشبہ اللہ میرا رب ہے اورتمہارا بھی لہٰذا (بلاشرکت غیرے) اسی کی عبادت کرو، یہی سیدھا راستہ ہے۔

پس (اہل کتاب کے) مختلف فرقوں نے عیسیٰؑ کے تعلق سے باہم اختلاف کیا۔

پس ان کافروں کے لیے (جنہوں نے حضرت عیسیٰؑ کے متعلق بدعقیدگی پیدا کی تھی) قیامت کے بڑے ہی ہولناک دن بڑی خرابی ہوگی۔

جس دن وہ ہمارے پاس لائے جائیں گے ( حقیقت حال سے باخبر ہو کر اللہ تعالیٰ کی بات) کیا ہی غور سے سننے اوردیکھنے والے ہوں گے۔

لیکن ظالم اس دن دیکھ لیں گے کہ وہ کھلی گمراہی میں تھے۔

انھیں اس حسرت ناک اوربڑے ہی سخت ندامت کے دن سے ڈرائیے۔

جب (دوزخیوں کا) آخری فیصلہ کیا جائے گا توانھیں معلوم ہوگا

کہ وہ بڑی غفلت میں پڑے رہے اورانجام آخرت پریقین نہیں رکھا۔

آخرکارزمین اوراس پر رہنے والوں کے ہم ہی وارث رہ جائیں گے

اور وہ سب (محاسبہ اعمال کے لیے) ہمارے حضور لائے جائیں گے۔

بلاشبہ وہ راست گو اور راست باز انسان اورنبی تھے۔

وہ واقعہ بھی یاد رکھنے کے قابل ہے جب کہ ابراہیمؑ نے اپنے باپ سے کہا تھا ابا آپ ایسی چیزوں کوکیوں پوجتے ہو

جونہ سنیں اورنہ دیکھیں اورنہ آپ کے کسی کام آسکیں۔

ابا میرے پاس (وحی کہ ذریعہ) ایسا علم پہنچا ہے جو آپ کے پاس نہیں آیا۔

آپ میرے کہے پر چلیں تومیں آپ کوسیدھی راہ بتلادوں گا ۔

ابا شیطان کی پیروی نہ کیجئے۔

یقیناً شیطان رحمن کی نافرمانی کرنے والا ہے۔

ابا (اگر میری بات نہ مانوگے تو) مجھے اندیشہ ہے کہ رحمٰن کی طرف سے آپ پر کوئی عذاب آپڑے۔

پھر آپ شیطان کے ساتھی بنے رہو گے۔

باپ نے کہا ائے ابراہیمؑ کیا تومیرے معبودوں، (حاجت رواؤں، مشکل کشاؤں) سے روگردانی کرتا ہے ؟

اگر تم ان باتوں سے باز نہ آؤگے تومیں تمہیں سنگسار کردوں گا اور تم ہمیشہ کے لیے الگ ہوجاؤ۔

ابراہیمؑ نے باپ سے جدا ہوتے ہوئے سلام علیکم کہا اور کہا میں آپ کے لیے اپنے پروردگار سے دعا کروں گا، یقینا ًوہ مجھ پر بڑا ہی مہربان ہے۔

اورکہا میں تم لوگوں سے کنارہ کش ہوجاتا ہوں اور ان سے بھی جن کوتم اللہ کے سوا پکارتے ہو۔

اورمیں مدد کے لیے اللہ ہی کوپکارتا ہوں، مجھے امید ہے کہ اپنے پروردگار کوپکار کرمحروم نہیں رہوں گا۔

پھرجب ابراہیمؑ اپنے باپ، قوم، خاندان اوران معبودان باطلہ سے جن کی یہ لوگ اللہ کے سوا عبادت کرتے تھے الگ ہوگئے

اور ہم نے انھیں اسحاق نامی بیٹا اوریعقوب نامی پوتا عطا کیا اورہرایک کو نبی بنایا۔

اورہم نے انھیں اپنی رحمتوں سے نوازا اورصحیح معنوں میں ان کا ذکر جمیل لوگوں کی زبان پرجاری کردیا۔

بلاشبہ وہ مخلص بندہ تھے رسول بھی تھے نبی بھی تھے۔

(مخلص کا ایک مطلب تویہ ہے کہ وہ شرک سے بچے ہوئے تھے۔ دوسرا یہ کہ وہ اللہ تعالیٰ کے منتخب بندے تھے یہاں یہودیوں کوتوجہ دلانا مقصود ہے کہ تم موسیٰؑ کی امت میں ہونے کا دعویٰ کرتے ہوحالانکہ تمہارے پاس شرک عین دین ہے بلکہ کمال دین بنا ہوا ہے)۔

اورہم نے انھیں(موسیٰؑ کو) طورکے داہنے کنارے سے آواز دی( اور انھیں اپنا مقرب بنایا) اور ان سے براہ راست راز دارانہ کلام کرنے کے لئے نزدیک بلایا۔

اورہم نے اپنی مہربانی سے ان کے بھائی ہارونؑ کونبی بنایا (اور ان کے ساتھ کردیا)

اورکتاب(قرآن) میں اسمٰعیلؑ کے جوحالات مذکور ہیں انکو بیان کیجئے۔

بلاشبہ وہ وعدے کے بڑے سچے تھے اور وہ رسول بھی تھے نبی بھی تھے۔

اور وہ اپنے متعلقین کونماز پڑھنے اور زکوۃ دینے کی ہدایت کرتے تھے۔

اوراپنے پروردگار کے نزدیک پسندیدہ تھے۔

اورقرآن میں ادریسؑ کے جوحالات مذکور ہیں ان کوبیان کیجئے۔

یقیناً وہ بڑے سچے نبی تھے۔

اور ہم نے انھیں بلند مرتبہ تک پہنچایا۔

یہ وہ لوگ ہیں منجملہ انبیاء کے ، ان پر اللہ نے اپنا خاص فضل فرمایا، یہ سب آدمؑ کی اولاد ہیں۔

اورجن کوہم نے نوحؑ کے ساتھ کشتی میں سوار کیا۔

اورابراہیمؑ اوریعقوبؑ کی اولاد میں سے اوران لوگوں میں سے جن کوہم نے ہدایت دی اور برگزیدہ کیا، ان سب کا حال یہ تھا کہ جب بھی ان کے سامنے اللہ تعالیٰ کی رحمانیت کی تفصیلات سنائی جاتی ہیں

تووہ روتے ہوئے سجدہ میں گرپڑتے (یعنی روتے ہوئے اپنے گناہوں سے توبہ اوراپنی مغفرت کی التجا کرتے۔)

پھر ان کے بعد چند نا خلف ان کے جانشین ہوئے

نمازوں کوضائع کیا اور خواہشات نفس کی پیروی کی

پس وہ عنقریب اپنی سرکشی اورنافرمانی کے انجام بد سے دو چار ہونگے۔

البتہ جواپنی سرکشی اورنافرمانی کی روش سے باز آجائے اور نیک کام کرے۔

ایسے ہی لوگ جنت میں داخل ہوں گے اوران کی ذرہ برابر حق تلفی نہیں ہوگی۔

(یہ جنتیں دائمی ہوں گی اللہ) رحمن نے اپنے بندوں سے (آخرت کی زندگی میں) ان بہشت ہائے جاودانی کے عطا کرنے کا وعدہ کیا ہے جو ان کی نظروں سے پوشیدہ ہے۔

بے شک اللہ تعالیٰ کا وعدہ پورا ہوکر رہتا ہے (وعدہ کی ہوئی جنتیں مل کر رہیں گی )

وہ اس میں سلام کے سوا کوئی لغو اور بے ہودہ بات نہیں سنیں گے۔
( فرشتوں کی طرف سے انھیں جنت کی مبارکبادیاں دی جاتی رہیں گی)

اوران کے لیے اس (جنت) میں کھانے پینے کی چیزیں صبح شام مسلسل تیار ہونگی۔

یہ وہ جنت ہے جس کا وارث ہم اپنے بندوں میں سے اسی کوبنائیں گے جو (دنیوی زندگی میں اللہ تعالیٰ کی نافرمانی سے بچنے کی کوشش میں لگارہے) پرہیزگار ہوگا۔

(فرشتوں نے پیغمبر کوجواب دیا کہ ) ہم آپ کے پروردگار کے حکم کے بغیر نہیں اترسکتے۔

جوکچھ ہمارے آگے ہے اورجو کچھ ہمارے پیچھے ہے اورجوزمین وآسمان کے درمیان ہے سب کچھ اللہ تعالیٰ کے علم میں ہے،( اس کے حکم کے بغیر کوئی حرکت نہیں کرسکتا۔)

آپؐ کا رب کسی چیز کونہیں بھولتا (ہرآن اپنے بندوں کی حاجت روائی کرنے والا اپنے محتاج بندوں کوکیونکر بھول سکتا ہے)آپؐ کا رب کسی چیز کونہیں بھولتا (ہرآن اپنے بندوں کی حاجت روائی کرنے والا اپنے محتاج بندوں کوکیونکر بھول سکتا ہے)

آسمان اورزمین اورجو کچھ ان کے درمیان ہے سب کا پروردگار ہے

لہٰذا اسی (اللہ) کی عبادت کرو اور اسی کی عبادت پرجمے رہو۔

کیا تم کسی اورکواللہ تعالیٰ کی طرح بااختیار سمجھتے ہو ؟

کیا انسان اتنا بھی غور نہیں کرتا کہ

ہم نے اس کوعدم سے وجود میں لایا اوروہ اپنی پیدائش سے پہلے کچھ نہ تھا۔

پس ائے نبیؐ آپ کے پروردگار کی قسم ہم انھیں اورشیاطین کوجمع کرینگے۔

پھر ہم ان سب کوجہنم کے گرد حاضر کریں گے وہ (دہشت کے مارے) گھٹنوں کے بل (اوندھے منہ )جہنم میں گرپڑیں گے۔

پھر ہم (ان کفار کے) ہرگروہ میں سے ان لوگوں کوجدا کریں گے۔

کہ جو رحمٰن کے مقابلہ میں سرکشی میں سخت تھے ؟

پھر ہم ایسے لوگوں کوخوب جانتے ہیں کہ جو سب سے پہلے دوزخ میں داخل ہونے والے ہیں۔

اور تم میں سے کوئی بھی ایسا نہیں جس کا گزرجہنم پر سے نہ ہوتا ہو یہ بات آپ کے پروردگار کے پاس طے شدہ ہے (یعنی ایسا ہی ہوگا)

پھر ہم پرہیزگاروں کونجات دیں گے (جودنیوی زندگی میں اللہ تعالیٰ کی نافرمانی سے بچنے کی کوشش میں لگے رہتے ہیں)

اورظالموں کواس میں گھٹنوں کے بل اوندھے منہ پڑا ہوا چھوڑدیں گے

اورجب ان کے سامنے ہماری واضح آیتیں پڑھی جاتی ہیں تو وہ لوگ جو کافر ہیں بطور طنز اہل ایمان سے کہتے ہیں

دونوں فریقین میں سے مکان کس کے اچھے ہیں اور مجلسیں کس کی بہتر ہیں۔(کون دنیا میں خوشحال ہیں اورکس کی مجلسوں میں سامان عیش وطرب حاصل ہے ؟)

اورہم نے ان سے پہلے کتنی ہی ایسی قوموں کوہلاک کیا ہے

جوان سے زیادہ دولت اور نمود میں اچھے تھے۔

کہئے جوگمراہی میں پڑا رہتا ہے، رحمٰن اس کومہلت پرمہلت دیئے جاتے ہیں۔

یہاں تک کہ جب وہ اس کودیکھ لیں گے جس کا ان سے وعدہ کیا جاتا ہے۔

خواہ عذاب (دنیا میں آئے) خواہ قیامت میں

تووہ اس وقت جان لیں گے کہ کس کا ٹھکانہ بدترین ہے اورکسکا لشکر کمزور ہے۔

اوراللہ تعالیٰ ان لوگوں کی ہدایت میں اضافہ فرماتے رہتے ہیں جو ہدایت پرچلنے کی کوشش میں لگے رہتے ہیں۔

اورنیکیاں جوباقی رہنے والی ہیں وہ تمہارے پروردگار کے پاس بدلہ کے لحاظ سے بھی نہایت ہی بیش بہا ہیں اورانجام کے لحاظ سے بھی نہایت ہی اعلیٰ وارفع ہیں (یہ دنیا کی رونق وہاں کام نہ آئے گی)

(پیغمبرﷺ) کیا آپ نے اس شخص کودیکھا ہے جو ہماری آیتوں کے ساتھ کفر کرتا ہے (تعلیمات الٰہی کا منکر ہے)

اورکہتا ہے (اگر زندہ بھی ہوا تو) یہی مال اوراولاد مجھے وہاں بھی ملیں گے۔

کیا وہ غیب پرمطلع ہوگیا ہے یا اس نے رحمٰن سے کوئی عہد لیا ہے۔

ہرگز ایسا نہیں ہے، جو کچھ وہ کہہ رہا ہے ہم اس کے نامہ اعمال میں لکھتے جاتے ہیں۔

اور ہم اس کے لیے آہستہ آہستہ عذاب بڑھاتے جاتے ہیں۔

اورہم اس کی کہی ہوئی باتوں کے وارث ہیں اور وہ ہمارے پاس تنہا آئے گا (نہ اس کے پاس مال ہوگا اور نہ اولاد)

اوریہ لوگ اللہ تعالیٰ کے سوا اورمعبود تجویز کررکھے ہیں۔

تا کہ وہ ان کیلئےباعث عزت ہوں، ان کی حمایت وپشت پنا ہی کریں، ہرگز نہیں (ایسا کبھی نہیں ہوسکتا وَلَا يَسْتَطِيعُونَ لَهُمْ نَصْرًا وَلَا أَنفُسَهُمْ يَنصُرُونَ(اعراف ۱۹۲) وہ انکی کسی طرح مدد نہیں کرسکتے)

وہ معبودانِ باطلہ ان کی پرستش کا انکار کریں گے اوران کے مخالف ہوجائیں گے۔

لہٰذا آپ ان پرعذاب کی جلدی نہ کیجئے، ہم توان کی باتیں شمار کرتے ہیں۔

جس دن ہم متقین کو رحمٰن کی رحمانیت سے فیض یاب ہونے کے لیے جمع کریں گے۔

مجرمین کوتشنگی (پیاس) کی حالت میں جہنم کی طرف ہانک لے جائیں گے۔

( ان کے عقیدہ کے مطابق ان کے حامی) سفارش نہ کرسکیں گے

سوائے اس کے کہ جس نے رحمٰن سے اجازت حاصل کرلی ہو۔ یہ اجازت انبیاؑ اوراہل ایمان کے لیے مختص ہوگی اوراسی کی سفارش کی جائے گی جس سے اللہ تعالیٰ راضی ہوں۔

اور(وہ) کہتے ہیں رحمٰن نے اپنے بندوں میں سے کسی کواپنا بیٹا بنائے رکھا ہے۔

(اللہ تعالیٰ فرماتے ہیں) تم نے کیا ہی بری تجویز کر رکھی ہے۔

عجب نہیں کہ اس کی برائی سے آسمان ٹکڑے ٹکڑے ہوکر گر پڑے اور زمین پھٹ جائے اور پہاڑ ٹکڑے ٹکڑے ہوکر (ان پر) گرپڑیں۔

کہ انہوں نے رحمٰن کے لیے بیٹا تجویز کیا۔

اوررحمٰن کے شایان نہیں کہ کسی کواپنا بیٹا بنالے۔

تمام انسان جوآسمانوں اورزمین میں ہیں (قیامت کے دن) اللہ رحمٰن کے حضور بندہ (غلام) کی حیثیت سے حاضر ہوں گے۔

بلاشبہ اللہ تعالیٰ نے ان سب کا احاطہ کررکھا ہے اور ایک ایک کوشمار کر رکھا ہے (سب قانون رحمانیت میں جکڑے ہوئے ہیں)۔

اورسب قیامت کے دن (اللہ تعالیٰ کے حضور) تنہا حاضر ہوں گے۔

جو لوگ ایمان لائے (اپنے ایمان کوشرک کے اجزاء سے پاک رکھا) اور اچھے کام کیے ایسے لوگوں کے لیے

رحمٰن بہت جلد لوگوں کے دلوں میں ان کیلئے محبت پیدا کریں گے۔

پس ہم نے قرآن کوآپؐ کی زبان پر آسان کردیا تا کہ آپ اس کے ذریعہ متقین کو(مغفرت وجنت کی) خوشخبری سنائیں۔ اورحق کے خلاف جھگڑنے والوں کوان کے انجام بد سے ڈرائیں ۔

اور ہم نے (انکار حق کی پاداش میں) ان سے پہلے کتنی ہی قوموں کو ہلاک کردیا۔

کیا آپ ان میں سے کسی ایک کے وجود کو بھی محسوس کرتے ہو یا ان کی کوئی بھنک سنتے ہو( ان کا نام ونشان بھی باقی نہ رہا)