سورة ق

ق ٓ ، حروف مقطعات سے ہے ان کے کوئی معنی رسول اللہﷺ سے بہ سند صحیح منقول نہیں ہیں۔
قسم ہے قرآن مجید کی ۔
بلکہ انھیں (اہل مکہ کو ) تعجب اس بات پر ہے کہ ان کے پاس انھیں میں سے ایک خبردار کرنے والا آگیا۔
پھر حق بات کا انکار کرنے والے کہنے لگے یہ توبڑی عجیب بات ہے۔

جب ہم مرجائیں گے اور ہم مٹی میں مل کرمٹی ہوجائیں گے؟(کیا دوبارہ زندہ کئے جائیں گے؟)
اس طرح پھر زندہ ہونا توبعید ازقیاس ہے۔
یقیناً ہم جانتے ہیں کہ زمین ان کے جسم کو(کھا کھا کر) کس قدر کم کرتی ہے۔

اور ہمارے پاس ایک کتاب ہے جس میں سب کچھ محفوظ ہے ۔

بلکہ انہوں نے دین حق کواسی وقت جھٹلادیا جب کہ وہ ان کے پاس آیا۔
اسی وجہ سے وہ ایک طرح کے اضطراب اورالجھاؤ میں پڑگئے۔
کیا انہوں نے اپنے اوپر آسمان کو نہیں دیکھا۔

ہم نے اس کو کس طرح بنایا اور اس کو کس خوبی سے سجایا اور اس میں کہیں شگاف تک نہیں ہے۔

اور ہم نے زمین کوبچھایا اور اس میں پہاڑوں کاسلسلہ جمائے رکھا۔

اور ہم نے اس میں ہر طرح کی خوشنما نباتات اگائیں۔

توبہ وطاعت الٰہی کے ساتھ رجوع الی اللہ ہونے والے ہر ایک بندہ کے لئے اس میں بصیرت ونصیحت کا سامان ہے۔

اور ہم نے آسمان سے نہایت ہی بابرکت پانی برسایا (جس سے کثیر فوائد حاصل ہوتے ہیں)
پھر ہم نے اس سے باغ اگائے اور اناج کی کھیتیاں اگائیں۔
اور کھجور کے بلند وبالا درخت پیدا کئے جن پر پھلوں سے لدے ہوئے تہہ بہ تہہ خوشے لٹکتے ہیں۔

یہ سب کچھ اپنے بندوں کورزق دینے کے لئے ہے۔
اور ہم ہی اس پانی سے مردہ زمین کوزندگی بخشتے ہیں۔
قیامت کے دن مرے ہوئے انسانوں کا قبروں سے نکلنا، اسی طرح ہوگا۔
ان سے پہلے نوحؑ کی قوم اصحاب الرس(کنویں والوں) اور ثمود نے جھٹلایا۔
اورعادؔ اور فرعونؔ اورلوط ؔکے بھائی بند۔

اور اصحاب الایکہ( قوم شعیبؔ) اورقوم تُبَّعْ(یمن کے لوگ) ہر ایک نے رسولوں کوجھٹلایا۔ بالآخر عذاب الٰہی کی وعید ان سے متعلق ہوگئی۔

کیا ہم پہلی بار پیدا کرکے تھک گئے ہیں؟
بلکہ وہ دوبارہ ازسرنوپیدا کئے جانے کے بارے میں شک میں پڑے ہوئے ہیں۔

اور وہ وسوسے اورخیالات جو اسکے دل میں آتے ہیں۔ہم انکو بھی جانتے ہیں۔

اورہم اس کی رگ جاں سے بھی زیادہ قریب ہیں۔
جب لکھ لیتے ہیں دو لکھنے والے فرشتے جو دائیں اوربائیں بیٹھے رہتے ہیں۔

کوئی بات اس کی زبان پر نہیں آتی مگرایک فرشتہ اس کے پاس لکھنے کے لئے تیار رہتا ہے۔
پھر دیکھو کہ موت کی سختی حق کے ساتھ آپہنچی

(اس وقت کہا جائے گا) یہ وہی چیز ہے جس سے توبھاگتا تھا۔
اور (قیامت کے دن دوسرا) صور پھونکا جائے گا

(کہا جائے گا) یہی وہ دن ہے جس کا خوف دلایا جارہا تھا ۔
اور ہرشخص (قیامت کے دن) اس حال میں آئے گا کہ اس کے ساتھ (فرشتہ) اس کوہانک کر لانے والا رہے گا اور ایک (اس کے اعمال کی) گواہی دینے والا
( اور کہا جائے گا) یقینا تواس گھڑی کی نسبت بڑی ہی غفلت میں پڑا ہوا تھا۔

پھر ہم نے تجھ سے تیری غفلت (وآخرت فراموشی) کا پردہ ہٹادیا (جو تجھ پر پڑا ہوا تھا)
آج تیری نگاہ بڑی ہی تیز ہے(یعنی آج تواس سخت دن کودیکھ رہا ہے)

اورا س کا ہم نشین (فرشتہ) کہے گا جو کچھ میرے پاس تھا حاضر ہے( یعنی

اس کا کارنامہ)

ان دو فرشتوں کو(جو اس کے ساتھ لگے رہتے تھے) حکم ہوگا ہر اس شخص کوجو شدت کے ساتھ حق کی مخالفت کرتا تھا۔جہنم میں پھینک دو۔
کہ وہ بھلائیوں سے روکنے والا حد سے تجاوز کرنے والا (دین الٰہی میں) شکوک وشبہات پیدا کرنے والا تھا۔
جس نے اللہ تعالیٰ کے ساتھ اوربھی معبود مقرر کررکھے تھے لہٰذا اس کو سخت ترین عذاب میں ڈال دیا جائے۔
وہ شیطان جو اس کے ساتھ رہتا تھا کہے گا ائے ہمارے پروردگار میں نے اس کو جبراً سرکشی اور اورگمراہی میں مبتلا نہیں کیا۔

بلکہ یہ خود ہی انتہائی گمراہی میں پڑا ہوا تھا۔
ارشاد ہوگا میرے پاس مت جھگڑو۔
میں تم کوپہلے ہی اس انجام بد سے خبردار کرچکا تھا۔

میرے پاس بات نہیں بدلتی اورنہ میں اپنے بندوں پرظلم کرنے والا ہوں۔

جو بغیر دیکھے اللہ رحمٰن سے ڈرتا تھا۔

اور جو (اخلاص کے ساتھ) رجوع ہونے والا دل لے کر آنے والا تھا۔

(انھیں کہا جائے گا) اس جنت میں سلامتی کے ساتھ داخل ہوجاؤ ( اب تمہیں کسی قسم کا رنج وغم لاحق نہ ہوگا)
وہ دن حیات ابدی کا دن ہوگا۔
وہاں ان کے لئے وہ سب کچھ ہوگا جو وہ چاہیں گے اور ہمارے پاس ان کیلئے بہت کچھ ہے۔( جس کا وہ تصور بھی نہیں کرسکتے)
اورہم ان (اہل مکہ) سے قبل بہت سی امتوں کوہلاکت کرچکے ہیں
جو قوت میں ان سے زیادہ تھے
اور دنیا کے ملکوں کوان انہوں نے چھان مارا تھا

پھر کیا وہ کہیں جائے پناہ پاسکے ؟
بے شک ان واقعات میں بڑی ہی نصیحتیں اور عبرت ہے۔
ہر اس شخص کے لئے جو (سمجھنے والا) دل رکھتا ہو۔
یا (کلام الٰہی کو) اس طرح توجہ سے سنتا ہو (گویا کہ وہ) مذکورہ تباہی کے حالات کودیکھ رہا ہے۔

اور یقیناً ہم نے آسمانوں اورزمین کواور جوکچھ ان کے درمیان ہے (اپنی دست قدرت سے) چھ دن میں بنایا
اور ہمیں کوئی تھکن لاحق نہ ہوئی۔
لہٰذا ائے نبیؐ یہ لوگ جو کچھ باتیں بناتے ہیں ان پر صبر کیجئے
اورطلوع آفتاب وغروب آفتاب سے پہلے اپنے پروردگار کی تسبیح کیا کیجئے۔

اور رات میں بھی اس کی تسبیح کیا کیجئے
اورسجدہ ریزیوں کے بعد بھی۔

اور سنو، جس روز پکارنے والا پاس ہی سے پکارے گا۔

جس دن سب لوگ یقیناً اس چیخ کوسن لیں گے۔
وہی قبروں سے نکلنے کا دن ہوگا۔

بلاشبہ ہم ہی جِلاتے اور ہم ہی مارتے ہیں
اورہمارے ہی پاس لوٹ کرآنا ہے۔
اس دن زمین ان پر سے پھٹ جائے گی اور وہ جھٹ پٹ نکل کھڑے ہوجائیں گے۔
اس طرح (اگلے اورپچھلے انسانوں کو بہ یک وقت) جمع کرلینا ہمارے لئے آسان ہے۔

ائے نبیؐ جوباتیں یہ لوگ بنارہے ہیں (ان کی پرواہ نہ کیجئے)ہم انھیں خوب جانتے ہیں۔
آپؐ کا ان پر کوئی زور نہیں ہے کہ ایمان لانے پرانھیں مجبور کریں۔
لہٰذا آپ قرآن کے ذریعہ ہراس شخص کونصیحت کیجئے
جو(انجام آخر کی) وعید سے ڈرتا ہے۔