سورة يونس

اللہ کے نام (اسی کی مدد) سے جورحمٰن اور رحیم ہے، میں اس کا م کا آغاز کر ر ہا ہوں۔

یہ حروف مقطعات ہیں ان کے کوئی معنی رسول اللہ ﷺ سے بہ سند صحیح منقول نہیں ہیں۔

یہ دانائی سکھانے والی کتاب کی آیتیں ہیں کیا لوگوں کویہ بات عجیب معلوم ہوتی ہے کہ ہم نے انھیں میں کے ایک آدمی کی طرف وحی بھیجی؟

کہ وہ لوگوں کوآخرت کے ابدی انجام سے ڈرائے اورایمان والوں کو(جنت اوردرجات ِجنت کی) خوشخبری سنائے۔

ان کے لیے ان کے رب کے پاس بڑے درجے ہیں۔

کافروں نے کہا یہ شخص توکھلا جادوگر ہے۔

ائے لوگو بلا شبہ تمہارا رب اللہ ہی ہے جس نے آسمانوں اورزمین کوچھ دن میں پیدا کیا۔

پھرشاہی تخت پرجلوگر ہوا(زمین وآسمان میں احکام جاری کرنے لگا) وہ ہرکام کی مناسب تدبیر کرتا ہے۔

اس کی اجازت کے بغیر کوئی سفارش کرنے والا نہیں ہے۔

یہ ہے اس اللہ کی شان جوتمہارا رب ہے۔ لہٰذا (بلاشرکت غیرے) اسی کی عبادت کرو

کیا تم اب بھی نصیحت قبول نہ کروگے؟
( اوراسی غلط عقیدے پرقائم رہوگے کہ اللہ تعالیٰ اپنے مقرب بندوں کی رائے وسفارش سے احکام جاری کرتے ہیں)

تم سب کواسی اللہ تعالیٰ ہی کی طرف واپس جانا ہے۔ اللہ تعالیٰ کا یہ وعدہ سچا ہے جوپورا ہوکررہے گا۔

بیشک اسی نے پیدائش کی ابتداء کی پھر وہ دوبارہ بھی(قیامت میں) پیدا کرے گا۔

تا کہ ایمان لانے اورنیک عمل کرنے والوں کوانصاف کے ساتھ پوری پوری جزادے۔

اورجن لوگوں نے اس حقیقت کونہ مانا۔ ان کے اس انکار کی سزا میں ان کے لیے کھولتا ہوا پانی اوردرد ناک عذاب ہے۔

وہی توہے جس نے آفتاب کوروشن اورچاند کونورانی بنایا۔

اوران کے لیے منزلیں مقررکیں تا کہ تم برسوں(مہینوں دنوں) کی تعداد معلوم کرو اوروقت کا حساب بھی۔

اللہ تعالیٰ نے یہ چیزیں بے فائدہ نہیں پیدا کیں بلکہ اس کا ایک یقینی مقصد ہے۔

سمجھنے والوں کے لیے تفصیلی نشانیاں ہیں۔ (جوانسانوں کے لیے آخرت کی طرف رہنمائی کرنے اور اللہ تعالیٰ کوالہ واحد معبودومستعان ماننے کے لیے کافی ہیں)

(یہی نہیں) بلکہ رات دن کے اختلاف میں اورجوکچھ آسمانوں اورزمین میں اللہ تعالیٰ نے پیدا کیا ہے ان سب میں اللہ تعالیٰ سے ڈرنے والوں کے لیے نشانیاں ہیں(تاکہ اللہ تعالیٰ ہی کوالہ واحد معبود ومستعان مانیں اورمغفرت وجنت کے مستحق بنیں)

جن لوگوں کوہم سے ملنے کی توقع نہیں(یعنی محاسبۂ اعمال کے لیے ہمارے سامنے لائے جانے کا یقین نہیں) اوروہ دنیا ہی کی زندگی سے راضی وخوش ہیں اوراسی دنیا پرمطمئن ہوبیٹھے ہیں۔

اورجوہماری آیتوں سے غافل ہیں(یعنی ہمارے مقرر کردہ انجام سے بے خبر ہیں)

یہ وہ لوگ ہیں جن کا آخر ٹھکانہ (دوزخ) ہے کیونکہ یہی کچھ ان لوگوں نے اپنے عمل سے کمایا ہے۔

بے شک جوایمان لائے(یعنی جنہوں نے یہ حقیقت تسلیم کرلی کہ اللہ تعالیٰ ہی الہ واحد معبود مستعان ہیں) اورنیک کام کرتے رہے۔

ان کے ایمان کی وجہ ان کا پروردگار انھیں جنت نعیم کی راہ دکھائے گا جس کے نیچے سے نہریں بہتی ہوں گی (جس کا نہایت ہی خوشنما منظرہوگا)

جس میں وہ (بے ساختہ) سُبْحَانَکَ اللّٰھُمَّ کہیں گے
( حدیث ابوکعب میں مرفوعا آیا ہے کہ جب وہ سبحان اللہ کہیں گے توجو چیز جنت کی چاہیں گے، وہ اللہ تعالیٰ کی طرف سے آجائے گی)

اوراس (جنت) میں ان کیلئے دعائیہ کلمہ ’’السلام علیکم‘‘ ہوگا ( اللہ تعالیٰ اور فرشتے ان پر سلام بھیجتے ہونگے ’سَلَامٌ قَوْلًا مِّن الرَّبِّ الرَّحِیْم‘ پروردگار مہربان کی طرف سے سلام بھیجا جائیے گا (یٰسٓ ع)

اوران کا آخری قول اَلْحَمْدُ لِلہِ رَبِّ الْعٰلَمِیْن ہوگا۔
یعنی ساری تعریف اللہ تعالیٰ ہی کے لیے ہے جوتمام جہانوں کا بلا شرکت غیرے حاجت رواوکارساز ہرقسم کے نقص وخامی سے پاک ہے۔

اوراگراللہ تعالیٰ لوگوں کوضررپہنچانے میں ایسی ہی جلدی کرتے جیسے بھلائی پہنچانے میں جلدی کرتے ہیں۔

تووہ کب کے تباہ کردیئے گئے ہوتے۔

لہٰذا جولوگ اس بات کا یقین نہیں کرتے کہ انھیں اللہ تعالیٰ کے سامنے حاضر ہونا ہے (اور انھیں اپنے اعمال کی جواب دہی کرنی ہے تواللہ تعالیٰ انھیں اسی سرکشی میں سرگرداں رہنے کیلئے چھوڑدیتے ہیں۔

انسان جب کسی سخت مصیبت میں مبتلا ہوتا ہے توکھڑے بیٹھے یا لیٹے ہرحال میں ہم ہی کومدد کے لیے پکارنے لگتا ہے

پھرجب ہم اس سے اس کی مصیبت دورکردیتے ہیں توایسا بےپروا ہوجاتا ہے گویا کہ وہ اپنی تکلیف دورکرنے کے لیے ہم کوپکارا ہی نہ تھا۔

اس طرح حد سے گزرجانے والوں کوان کے اعمال ان کی نظرمیں خوشنما بنادیئے جاتے ہیں۔

اورتم سے پہلے کئی ایک امتوں کوجب وہ ظلم پراترآئے (شرک کے مرتکب ہوئے) تو ہم نے انھیں ہلاک کردیا۔

حالانکہ ان کے پاس ان کے رسول کھلی نشانیوں کے ساتھ آئے تھے۔ اوروہ ایسے نہ تھے کہ ایمان لاتے۔

ہم مجرمین کوایسی ہی سزادیتے ہیں۔

پھر ہم نے ان کی ہلاکت کے بعد تم کوملک میں خلیفہ بنادیا تا کہ ہم دیکھیں کہ تم کس طرح عمل کرتے ہو۔

اورجب ان کوہمارے احکام پڑھ کرسنائے جاتے ہیں

تووہ لوگ جنہیں (محاسبۂ اعمال کے لیے) ہمارے روبرو حاضرکیے جانے کا یقین نہیں۔ کہتے ہیں۔ اس قرآن کے سواکوئی اورقرآن لے آؤ(جس میں ہمارے بتوں کی مذمت نہ ہو) یا اس کے بعض اجزاء کوبدل دو۔

آپ کہہ دیجئے مجھ سے یہ ہونہیں سکتا کہ میں اپنی طرف سے اس میں تغیروترمیم کرسکوں۔

میں ان احکام کی اتباع کرتا ہوں جومیری طرف وحی کیے جاتے ہیں۔

اگرمیں اپنے پروردگار کی نافرمانی کروں تومجھے ایک بڑے (ہولناک) دن کے عذاب کا ڈرہے۔

کہئے اگراللہ تعالیٰ نے یہ نہ چاہا ہوتا کہ میں یہ قرآن تمہیں سناؤں تومیں کبھی نہ سناسکتا اورنہ تم کواس کی خبر دے سکتا۔

(تم جانتے ہوکہ) اس سے پہلے میں اپنی عمر کا ایک بڑا حصہ تم میں گزارچکا ہوں( مگرایسی کوئی بات میں نے تم سے نہیں کہی)

کیا تم عقل سے کام نہیں لیتے اتنی بات سمجھ نہیںسکتے

پھر اس سے بڑھ کرظالم کون ہوگا جوایک جھوٹی بات گھڑ کراللہ تعالیٰ کی طرف منسوب کرے۔ یا اس کی آیتوں کوجھٹلادے۔

یقیناً مجرم فلاح نہیں پاسکتے۔

اوریہ لوگ اللہ تعالیٰ کے سوا ان کی پرستش کرتے ہیں جوان کونہ نفع پہنچاسکتے اورنہ نقصان۔

اورکہتے ہیں یہ اللہ تعالیٰ کے پاس ہمارے سفارشی ہیں۔

ائے نبی محمدﷺ ان سے کہیے۔ کیا تم ان اللہ تعالیٰ کوایسی چیز کی خبر دیتے ہو جو اللہ تعالیٰ کو معلوم نہیں (جس کا وجود نہ آسمانوں میں ہے اور زمین میں )

وہ پاک وبرترہے، اس شرک سے جویہ کرتے ہیں۔

ابتداء تمام انسان ایک ہی دین کے پیروتھے پھر(دین الٰہی کوبھول کر) اختلاف کیا (مختلف ادیان میں بٹ گئے)

اوراگر آپ کے رب کی طرف سے پہلے ہی اختلاف کے فیصلہ کی بات طے کرلی نہ گئی ہوتی۔

تووہ جن باتوں میں اختلاف کرتے ہیں، کب کا فیصلہ کردیا گیا ہوتا۔تووہ جن باتوں میں اختلاف کرتے ہیں، کب کا فیصلہ کردیا گیا ہوتا۔

اورکہتے ہیں کہ اس نبی پر(نبوت کی) کوئی نشانی اس کے رب کی طرف سے کیوں نہیں نازل کی گئی؟

کہئے غیب کی تمام باتیں اللہ تعالیٰ ہی جانتے ہیں لہٰذا(انجام کا) تم بھی انتظار کرومیں بھی تمہارے ساتھ انتظار کرنے والوں میں سے ہوں۔

لوگوں کوتکلیف پہنچنے کے بعد جب ہم اپنی رحمت سے

انھیں نعمتیں بخشتے ہیں (یعنی بدحالی کے بعد خوشحالی عطا کرتے ہیں) تو فوراً ہی ہماری آیتوں کے بارے میں مخالفانہ سرگرمیاں شروع کردیتے ہیں۔

ائے نبیﷺ کہہ دیجئے اللہ تعالیٰ بہت جلد (تمہیں اس تکذیب واستہزا کی) سزادیں گے۔

تم جوکچھ مکروفریب کررہے ہو، ہمارے فرشتے لکھتے جاتے ہیں۔

(اللہ) وہی تو ہے جوتم کوبحروبر(خشکی وتری) میں چلاتا پھراتا ہے۔

یہاں تک کہ جب تم کشتیوں میں سوار ہوتے ہو۔

اوروہ کشتیاں موافق ہواؤں کے ذریعہ کشتی کے سواروں کولیے چلتی ہیں اور وہ ان سے خوش ہوتے ہیں دفعتًہ ان پرایک تیز وتند ہواؤں کا جھونکا چلتا ہے۔

اورہرطرف سے ان پر(طوفانی) موجیں اٹھی چلی آتی ہیں۔

اور وہ خیال کرتے ہیں کہ اب تو وہ (ہلاکت خیز لہروں میں) گھرگئے ہیں۔

وہ اس وقت بڑے ہی اخلاص وجذبہ اطاعت کے ساتھ (مدد کے لیے) اللہ تعالیٰ کوپکارتے ہیں۔

(اللہ تعالیٰ) اگر آپ ہم کواس مصیبت سے بچالیں توہم ضرور آپ کے شکر گزاربندے بنے رہیں گے۔

پھرجب ہم ان کواس ہلاکت سے بچالیتے ہیں تووہ اسی لمحہ حق سے منحرف ہوکرزمین پرباغبانہ روش ا ختیار کرتے ہیں( یعنی شرک ومعصیت میں مبتلا ہوجاتے ہیں)

ائے لوگو! یہ تمہاری سرکشی تمہارے ہی لیے وبال جان ہوگی۔

دنیا کی چند روزہ زندگی سے فائدہ اٹھالو۔ پھرتم محاسبہ اعمال کیلئے ہماری طرف لوٹ کرآؤگے اورہم بتادیں گے کہ تم کیا کچھ کرتے رہے تھے۔

دنیا کی زندگی مینہ کی سی ہے جسے ہم آسمان سے برساتے ہیں۔

پھرپانی اورزمین کے اختلاط سے زمین کی روئیدگی، سبزہ، نباتات، پھل، میوہ وغیرہ جنہیں انسان اورجانورکھاتے ہیں، پیدا کیے۔

یہاں تک کہ زمین، سبزہ اورنباتات سے پربہاروپررونق ہوجاتی ہے۔

اوراس کے مالک سمجھ بیٹھے کہ وہ اس (تیارشدہ فصل) پرپوری طرح قادرہوچکے ہیں( دوایک روزمیں فصلیں کاٹ لیں گے وغیرہ)

اچانک رات یا دن میں ہمارا حکم (عذاب) آپہنچتا ہے توہم اس کوکاٹی ہوئی کھیتی کی طرح کردیتے ہیں، گویا کہ کل تک وہاں کوئی کھیتی تھی ہی نہیں۔

اس طرح ہم اہل فکر کے لیے اپنی نشانیاں کھول کھول کربیان کرتے ہیں۔

اوراللہ تعالیٰ تم کوابدی سلامتی کے گھر(جنت) کی طرف بلارہے ہیں۔
(اورتم ادبی تباہی کی طرف جارہے ہو)

اور وہ جس کوچاہتے ہیںسیدھا راستہ دکھاتے ہیں (یعنی جوطالب ہدایت ہوتا ہے، اس کو ہدایت دیتے، ہیں (وَيَهْدِي إِلَيْهِ مَن يُنِيبُ ) (سورہ شوریٰ)

جن لوگوں نے (ایمان کی حالت میں) نیکیاں کیں ان کے لیے آخرت میں خوبیاں ہی خوبیاں ہیں اوران میں اضافہ ہی ہوتا رہتا ہے۔ (دراصل نیکی اللہ تعالیٰ کوالہ واحدمعبود ومستعان ماننا اوراللہ تعالیٰ کی ہدایت کے مطابق رسول اللہﷺ کی اتباع میں زندگی گزارنا ہے)

اوران کے چہروں پرنہ توسیاہی چھائے گی اورنہ رسوائی۔

وہ جنتی ہیں اوروہ ہمیشہ اسی میں رہیں گے۔

اورجن لوگوں نے (شرک اورکفر جیسی) برائیوں کواختیارکیا توانھیں اس کا بدل ویسا ہی براملے گا۔

اوران پرذلت ورسوائی چھائی ہوگی۔ ان کواللہ تعالیٰ کے عذاب سے کوئی بچانہ سکے گا۔

(شدت غم سے) ان کے چہرے ایسے سیاہ ہوں گے گویا کہ اندھیری رات کے سیاہ پردے ان پرڈھانک دیئے گئے ہیں

ایسے ہی لوگ دوزخی ہیں جس میں وہ ہمیشہ ہمیشہ رہیں گے۔

اورجس دن ہم سب لوگوں کومحاسبہ اعمال کے لیے جمع کریں گے۔ پھرمشرکین سے کہیں گے۔

تم اورتمہارے شریک اپنی اپنی جگہ ٹھیرے رہو۔
(جنہیں تم نے شریک خدائی بنارکھا تھا)

پھرہم ان کے درمیان جدائی ڈال دیں گے(یعنی ان کی عقیدتیں عداوت میں تبدیل ہوجائیں گی) اوران کے شریک ان سے کہیں گے کہ (تم جھوٹے ہو)تم ہماری عبادت نہیں کرتے تھے۔

لہٰذا ہمارے تمہارے درمیان اللہ تعالیٰ کی گواہی کافی ہے۔

وہاں ہرشخص جان لے گا کہ اس نے اپنی زندگی میں کیا کچھ کیا تھا۔

اور وہ اللہ تعالیٰ کی طرف جوان کا حقیقی مالک ہے لوٹائے جائینگے اور انہوں نے جوکچھ افترا پردازی کی تھی وہ سب کچھ (ان کے ذہن سے) نکل جائیگی۔

اور وہ اللہ تعالیٰ کی طرف جوان کا حقیقی مالک ہے لوٹائے جائینگے اور انہوں نے جوکچھ افترا پردازی کی تھی وہ سب کچھ (ان کے ذہن سے) نکل جائیگی۔

ائے پیغمبرﷺ! ان سے پوچھئے کہ تم کوزمین وآسمان سے کون رزق دیتا ہے؟

یا تمہاری سماعت وبصارت کے پیدا کرنے پرکون قدرت رکھتا ہے؟ (کون تمہاری سماعت وبصارت کا حقیقی مالک ہے؟)

اورکون بے جان سے جاندار کوپیدا کرتا ہے؟

اورکون جاندار سے بے جان کوپیدا کرتا ہے؟
اورکائنات ارضی وسماوی کا نظام کس کے حکم سے چل رہا ہے؟
(کائنات کی کارسازی وحاجت براری کون کررہا ہے)

بے ساختہ کہیں گے ’’اللہ‘‘ توپھر ان سے کہئے تم اس حقیقت کومان کربھی اللہ تعالیٰ سے کیوں نہیں ڈرتے؟(یعنی اللہ تعالیٰ کے ساتھ اللہ کے مقرب بندوں کوبھی الٰہ قرراردیتے ہو؟)

لہٰذا یہی اللہ تمہارا پروردگار برحق ہے(جوبلاشرکت ِغیرے تمہارا حقیقی پالنہار، حاجت روا اورکارساز ہے)

یہی جب حق ہے تواس کے بعد جو کچھ ہے وہ گمراہی کے سوا اورکیا ہے۔ پھر تم کدھر اٹھے جارہے ہو(یعنی سیدھا راستہ چھوڑکرکفروگمراہی کی طرف جارہے ہو)

اس طرح(ائے نبیﷺ) آپ کے رب کی یہ بات سرکش اور نافرمانوں کے حق میں پوری ہوکررہی کہ وہ ایمان نہ لائیں گے(یعنی اپنے اختیار اورعقل وفطرت کا غلط استعمال کریں گے)

ائے نبیﷺ ان سے پوچھئے کیا تمہارے (تجویز کئے ہوئے) شرکاء میں کوئی ایسا بھی ہے جوپہلی بارمخلوقات کوپیدا کرے پھر(قیامت میں) دوبارہ بھی پیدا کردے؟

آپ کہہ دیجئے کہ اللہ تعالیٰ ہی پہلی بار پیدا کرتے ہیں۔ پھروہی دوبارہ بھی پیدا کریں گے پھرتم کدھر بھٹکائے جارہے ہو؟

(ائے نبیﷺ) ان سے پوچھئے کیا تمہارے شرکاء میں کوئی اس قابل ہے کہ راہ حق دکھائے؟

کہئے اللہ تعالیٰ ہی راہ حق دکھاتے ہیں۔

کیا وہ جوحق کا راستہ دکھائے زیادہ حق دار ہے کہ اس کی اتباع کی جائے؟

یا وہ کہ جب تک کوئی اسے راستہ نہ بتائے راستہ نہ پائے(کیا ایسے کواللہ تعالیٰ کے ساتھ الہ قراردیا جاسکتا ہے؟)

توتم کوکیا ہوگیا؟ تم کیسی الٹی تجویزیں کرتے ہو؟

اوران میں اکثرلوگ ظن وتخمین اوربے اصل خیالات کی اتباع کرتے ہیں۔

یقیناً ظن وقیاس کی بنیاد پرکوئی شخص حقیقت تک نہیں پہنچ سکتا۔

بے شک اللہ تعالیٰ خوب واقف ہیں ان اعمال سے جو وہ کرتے ہیں۔

اوریہ قرآن ایسا نہیں ہے کہ اللہ تعالیٰ کے سواکوئی اپنی طرف سے بنالائے۔

بلکہ یہ قرآن تواللہ تعالیٰ کی اس تعلیم کوپیش کرتا ہے جودنیا میں اس سے پہلے آچکی ہے اورسابقہ الٰہی تعلیم کی اس میں تفصیل ہے۔ کلام رب العالمین کی طرف سے نازل ہوا ہے۔ جس کے منزل من اللہ ہونے میں کسی طرح کا شک وشبہ نہیں کیا جاسکتا۔

کیا یہ لوگ کہتے ہیں کہ پیغمبر نے اس کواپنی طرف سے گھڑلیا ہے؟

توکہئے تم اس کی مثل کوئی سورۃ بنالاؤ اورہوسکے تواللہ تعالیٰ کے سوا جن جن کواس کام میں شریک کرسکتے ہو کر دیکھو اگر تم سچے ہو (یعنی اگر تمہاری یہ بات صحیح ہے کہ انسان ایسی کتاب لکھ سکتا ہے توتم بھی انسان ہوایسی کوئی سورۃ تصنیف کرلاؤ)

بلکہ ان لوگوں نے ایسی چیز کی تکذیب کی ہے جس کے صحیح یا غلط ہونے کو اپنے احاطہ علمی میں نہ لاسکے(یعنی قرآن سننے کے بعداس کی تعلیمات پرغور وفکر کیے بغیر جھٹلادیا)

اورابھی اس(قرآن) کی حقیقت ان پرکھلی ہی نہیں۔

ان سے پہلے بھی لوگوں نے اسی طرح حق بات کی تکذیب کی تھی۔

پھردیکھ لیجئے ان ظالموں کا کیا(ہی برا) انجام ہوا(اسی طرح ان کا بھی ہوگا)

اوران میں بعض ایسے ہیں جو اس (قرآن) پرایمان لاتے ہیں۔ اوربعض ایسے ہیں کہ اس پرایمان نہیں لاتے۔

اورآپ کا پروردگار مفسدوں کوخوب جانتا ہے۔

اوراگریہ(ان دلائل کے بعد بھی) آپ کو جھٹلاتے رہیں تو کہہ دیجئے میرے لئے میرا عمل ہے اورتمہارے لیے تمہارا عمل(یعنی میرے عمل کا میں بدل پاؤں گا اورتمہارے عمل کا تم، تم میرے اعمال کے جواب دہ نہیں ہواورنہ میں تمہارے کیے ہوئے اعمال کا ذمہ دار ہوں۔)

اوران میں بعض ایسے لوگ بھی ہیں جو(بظاہر) آپ کی طرف کان لگائے رکھتے ہیں(لیکن ان کامقصد بات کوسمجھنا نہیں ہوتا)

توکیا آپؐ بہروں کوسنا سکتے ہیں جب کہ وہ سمجھنا ہی نہ چاہتے ہوں۔

اوران میں کوئی ایسا بھی ہے جو(بظاہر محسوس ہوتا ہے کہ وہ) آپ کی طرف ہمہ تن متوجہ ہے۔

توکیا آپ اندھوں کوراستہ بتاسکتے ہیں؟ جب کہ وہ سمجھ بوجھ سے کام لینا ہی نہ چاہتے ہوں۔

واقعہ یہ ہے کہ اللہ تعالیٰ لوگوں پرذرہ برابر بھی ظلم نہیں کرتے لیکن لوگ خودہی اپنے آپ پرظلم کرتے ہیں۔

اورجس دن وہ(پرسش اعمال کیلئے) جمع کیے جائیں گے تو انھیں ایسا معلوم ہوگا کہ وہ دنیا میں ایک گھڑی بھر دن سے زیادہ نہیں رہے تھے۔ وہ آپس میں ایک دوسرے کوپہچانیں گے۔

یقیناً بڑے ہی نقصان میں رہے وہ لوگ جنہوں نے اللہ تعالیٰ کے سامنے حاضر ہونے کی حقیقت کوجھٹلادیا اوروہ ہدایت نہ پاسکے۔

اوراگر اس عذاب کا کچھ حصہ جس کا ہم نے ان سے وعدہ کیا ہے، آپؐ کو دنیا ہی میں دکھادیں یا

اس سے پہلے ہی آپؐ کواٹھالیں، بہرحال ان کوآخر ہمارے ہی پاس لوٹ کر آنا ہے۔ پھر جوکچھ وہ کررہے تھے اللہ تعالیٰ ان کے ایک ایک عمل کی گواہی دینگے۔

اور ہر امت کیلئے رسول بھیجا گیا۔ پھر جب انکا رسول آجاتا ہے (اور قوم دعوت حق کا انکار کرتی ہے تو) انکے درمیان منصفانہ فیصلہ کردیا جاتا ہے۔

ان پرکسی طرح کا ظلم نہیں کیا جاتا(یہ اپنے کئے کی سزا پائیں گے)

اوروہ کہتے ہیں اگرآپؐ سچے ہیں توبتاؤ وہ وعدۂ عذاب کب آئے گا؟

کہئے میں تواپنے نفع ونقصان کا کچھ بھی اختیار نہیں رکھتا سوائے اس کے جواللہ تعالیٰ ہی چاہے(یعنی سب کچھ اللہ تعالیٰ کی مشیت پرمنحصر ہے)

(ہرقوم) ہرامت کے لیے اس کی تباہی اورموت کا ایک وقت مقرر ہے۔ جب ان کا وقت آجاتا ہے۔

تووہ ایک ساعت متاخر کرسکتے ہیں اورنہ(ایک ساعت) کی تقدیم کرسکتے ہیں۔

(ائے نبیﷺ) ان سے کہئے کیا تم نے یہ بھی سوچا ہے کہ اگراللہ کا عذاب تم پر(اچانک) دن یا رات میں (کسی وقت بھی) آجائے (تو اس سے بچنے کی کیا کوئی صورت بھی ہے؟ پھر پوچھنے سے کیا حاصل) پھر مجرم اس (عذاب) کی جلدی کس لیے کرتے ہیں؟

کیا پھر جب وہ عذاب واقع ہوجائے گا تب اس پرایمان لادیں گے(تمہارا اس وقت ایمان لانا مفید نہ ہوگا)

( اس وقت کہا جائے گا) اب ایمان لاتے ہو اورتم تواس (عذاب) کے جلد آنے کی خواہش مند تھے۔

پھرظالموں سے کہا جائے گا ہمیشہ ہمیشہ کا عذاب چکھتے رہو۔

اب تمہیں ان ہی اعمال کا بدلہ دیا جائے گا جوتم دنیا میں کرتے رہے تھے۔

(یہ باتیں سن کر) وہ آپ سے پوچھتے ہیں کیا واقعی ایسا ہوگا۔

کہئے ہاں ہاں قسم ہے میرے رب کی یہ بات بالکل حق ہے۔

اورتم اس کے واقع ہونے سے اس کوروک نہیں سکتے۔

اوراگر ہراس شخص کے پاس جس نے ظلم کیا ہے (یعنی مشرکانہ عقائد اختیارکیے ہیں) روئے زمین کی ساری دولت بھی ہوتی وہ اس کوفدیہ میں دے کرعذاب سے بچنا چاہتا۔

اورجب وہ اس عذاب کودیکھیں گے تودل ہی دل میں پچھتائیں گے۔

اوران کے درمیان منصفانہ فیصلہ کردیا جائے گا۔ اوران پر (کسی طرح ) زیادتی نہ ہوگی۔

خبردار! سنو جوکچھ آسمانوں اورزمین میں ہے، سب اسی اللہ کا ہے۔

اوراس بات سے بھی آگاہ ہوجاؤ اللہ تعالیٰ کا وعدہ سچا ہے(یعنی اللہ تعالیٰ نے عذاب کا جووعدہ کیا ہے وہ بالکل حق ہے) لیکن اکثر لوگ (ان حقائق کو) نہیں جانتے ۔

وہی زندگی بخشتا ہے اوروہی موت دیتا ہے اوراسی کی طرف تم سب کولوٹ کرجانا ہے۔

ائے لوگو! تمہارے پاس تمہارے رب کی طرف سے نصیحت (بہ شکل قرآن) آچکی ہے اوروہ دل کی بیماریوں کے لیے شفاء ہے۔

اوراہل ایمان کے لیے (یعنی اس تعلیم کوقبول کرنے والوں کے لیے) ہدایت ورحمت ہے۔

کہئے! اللہ تعالیٰ کے فضل اوراس کی اس رحمت پر(کہ قرآن نازل فرماکر) ہدایت ورحمت کا ذریعہ بنایا(خوب) خوشیاں مناؤ۔

وہ(قرآن) اس دولت سے کہیں زیادہ بہتر ہے (جس کوجمع کرنے کی دھن میں لوگ لگے رہتے ہیں۔

ائے نبی (ﷺ) ان سے کہئے کیا تم نے کبھی غور بھی کیا ہے؟ کہ جو رزق اللہ تعالیٰ نے تمہارے لیے نازل کیا ہے۔

توتم نے اس میں(اپنے طورپر) کسی کوحرام اورکسی کوحلال ٹھہرایا۔

ان سے پوچھئے کیا اللہ تعالیٰ نے تم کواس کی اجازت دی ہے یا تم اللہ تعالیٰ پرافتراء کرتے ہو۔

اورجولوگ اللہ تعالیٰ کی طرف جھوٹی باتیں منسوب کرتے ہیں قیامت کے دن کوآخر کیا سمجھے ہوئے ہیں

بے شک اللہ تعالیٰ لوگوں پربڑے ہی مہربان ہیں لیکن اکثرلوگ شکرنہیں کرتے۔

اور تم جس حال میں بھی ہوتے ہواورجوکچھ قرآن میں سے پڑھتے ہواورتم کوئی عمل کرنہیں پاتے مگرہم تم پرنگران ہوتے ہیں(یعنی تمہارے اعمال ہماری نظروں میں ہوتے ہیں جب تم اس میں مشغول ہوتے ہو۔)

اورتمہارے پروردگار سے ذرہ برابر چیز پوشیدہ نہیں ہے نہ زمین میں نہ آسمان میں۔

اورنہ کوئی چیز اس سے چھوٹی اورنہ بڑی ایسی ہے، جوکھلی کتاب (اللہ کے دفتر میں) میں لکھی ہوئی نہ ہو۔

سنو (آگاہ ہوجاؤ) بے شک جولوگ اللہ تعالیٰ کے دوست ہیں ان پرکسی قسم کا خوف طاری ہوتا ہے اورنہ وہ حزن وملال میں مبتلا ہوتے ہیں۔

یہ وہ لوگ ہیں، جوایمان لائے(اللہ تعالیٰ کویقیناً واحد معبود ومستعان، کارساز، حاجت روامانا اورپرہیزگار بنے رہے (یعنی الٰہی تعلیم کے مطابق زندگی گزاری اوراحکام الٰہی کی خلاف ورزی سے بچتے رہے)

ان کے لیے دنیا کی زندگی میں بھی بشارتیں ہیں اورآخرت میں بھی۔

(یہ اللہ تعالیٰ کا وعدہ ہے) اللہ تعالیٰ کے کلام میں کوئی تبدیلی نہیں ہوتی۔

یہ (دنیا وآخرت کی خوشخبری) بہت بڑی کامیابی ہے۔

اور ائے نبی (ﷺ) ان (منکرانِ حق) کی (تکلیف دہ) باتوں سے آپؐ کورنجیدہ نہ ہونا چاہئے۔ بیشک عزت، وفرمانروائی سب کچھ اللہ تعالیٰ ہی کے اختیار میں ہے

وہی سب کچھ سنتا اورجانتا ہے۔

خبردار! آگاہ ہوجاؤ۔ اللہ تعالیٰ ہی کے اختیار وتصرف میں ہے مخلوق جوآسمانوں میں ہے اورجوزمین میں ہے (سب اسی کے بندے اورمملوک ہیں۔ اللہ تعالیٰ نے اپنے اختیار کا کوئی جزوکسی مقرب سے مقرب بندے کوعطا نہیں کیا ہے)
’’مَا یَمْلِکُوْنَ مِنْ خِطْمِیْرٌ مَاکَانَ لَہُمُ الْخِیَرَۃُ‘‘ (سورۂ قصص)

اورجولوگ اللہ تعالیٰ کے سوا (اپنے خود ساختہ شرکاء) کو(مدد کے لیے) پکارتے ہیں،

وہ تومحض اپنی من گھڑت باتوں اوروہم وگمان کی اتباع کرتے ہیں، اوروہ محض قیاس آرائیاں کرتے ہیں(من گھڑت باتیں اللہ تعالیٰ کی طرف منسوب کرتے ہیں)

اللہ وہی توہے جس نے تمہارے لیے رات بنائی تا کہ تم اس میں سکون حاصل کرو۔

اوردن کوروشن بنایا (تا کہ تم اپنے کاروبار انجام دے سکو۔ لیل ونہار کی اس تخلیق میں) گوش دل سے سننے والوں کے لیے (اللہ تعالیٰ کے اِلٰہ واحد، معبود ومستعان ہونے کی) بے حساب نشانیاں ہیں۔

اور(بعض لوگ) کہتے ہیں کہ اللہ تعالیٰ نے( اپنی حکمرانی میں رائے ومشورے کے لیے اپنی مخلوق میں سے) کسی کواپنا بیٹا بنالیا ہے ( یہ عیسائیوں کا عقیدہ ہے) سبحان اللہ وہ ایسی مشرکانہ باتوں سے پاک ومنزّہ ہے۔

وہ بے نیاز، بے احتیاج ہے (وہ کسی کی رائے ومشورہ وشرکت کا محتاج نہیں) جوکچھ آسمانوں اورزمین میں ہے(بلاشرکت غیرے) سب اسی کا ہے۔

کیا تمہارے پاس (ان مشرکانہ عقائد کی تائید میں) کوئی دلیل علمی بھی ہے؟

یا تم اللہ تعالیٰ کے متعلق ایسی باتیں کہتے ہو جس کوتم نہیں جانتے

ائے نبی (ﷺ) جولوگ اللہ تعالیٰ کی طرف ایسی مشرکانہ باتیں منسوب کرتے ہیں وہ کبھی فلاح نہیں پاسکتے۔

(ان کے لیے) دنیا کے چند روزہ فائدے ہیں۔ پھران کوہماری طرف لوٹ کرآنا ہے۔

پھرہم ان کوکفرکی پاداش میں سخت ترین عذاب کا مزہ چکھائیں گے۔

ائے نبی (ﷺ) انھیں نوحؑ کا قصہ سنائیے۔

جب انہوں نے اپنی قوم سے کہا۔ ائے میری قوم اگرتم کومیرا یہاں رہنا اوراللہ تعالیٰ کی آیتوں سے نصیحت کرنا ناگوار ہوتو(تم میرے خلاف جوچاہوکرلو)

میں تواللہ تعالیٰ ہی پربھروسہ رکھتا ہوں۔ لہٰذا تم سب اپنے (خودساختہ) شرکاء سمیت میرے خلاف تمام تدبیریں سوچ لو۔

پھراس کا کوئی پہلو تم سے پوشیدہ نہ رہنے پائے(یعنی کوئی کسراٹھانہ رکھو)

پھران تدابیر کوروبہ عمل لے آؤ اور مجھے ذرابھی مہلت نہ دو (مجھے یقین ہے کہ اللہ تعالیٰ میری مدد کریں گے اورتمہاری کوئی تدبیر کارگرنہ ہوگی)

پھراگرتم نے میری دعوت سے منہ موڑا(تواس میں میرا کیا نقصان) میں توتم سے اس کا کوئی صلہ نہیں چاہتا۔

میرا اجرتواللہ تعالیٰ پرہے (یعنی اللہ تعالیٰ ہی میرا اجردیں گے) اور مجھے حکم دیا گیا ہے کہ میں فرمانبرداروں میں رہوں (خواہ کوئی مانے یا نہ مانے)

پھرانہوں نے ان کی (نوحؑ کی) تکذیب کی، توہم نے نوحؑ کواوران کے ساتھیوں کوجوکشتی میں سوار تھے، طوفان سے بچالیا اورہم نے انھیں کو زمین پرباقی رکھا(ڈوب مرنے والوں کا قائم مقام بنایا)

اورجن لوگوں نے ہمارے احکام کوجھٹلایا، ہم نے انھیں غرق کردیا۔

پھردیکھئے(انجام آخرت سے) ڈرائے جانے والوں کا کیا ہی (برا) انجام ہوا۔

پھر نوحؑ کے بعد ہم نے اورپیغمبر اپنی اپنی قوم کی طرف بھیجے۔

پھروہ ان کے پاس واضح نشانیاں (معجزات) لے کرآئے مگروہ اس تعلیم کوماننے والے نہ تھے جسے وہ اس سے قبل جھٹلاچکے تھے۔

پھران کے بعد ہم نے موسیٰ وہارونؑ کوفرعون اوراس کے سرداروں کی طرف اپنی نشانیاں (معجزات) دے کربھیجا۔

توانہوں نے تکبر کیا اور وہ قوم تھی ہی گنہگار۔

پھر جب ہماری طرف سے حق بات ان پرظاہر ہوئی (یعنی معجزہ دیکھا) توکہنے لگے یہ توکھلا جادو ہے۔

موسی ٰ نے کہا کیا تم دین حق کوجبکہ وہ تمہارے پاس آیا ہے توکہتے ہو یہ جادو ہے؟ کیا جادوایسا ہوتا ہے حالانکہ جادوگرحق کے مقابلہ میں کبھی

کامیاب نہیں ہوتے (یعنی حق کے مقابلے میں جادوگروں کی کوئی بات چل نہیں سکتی)

انہوں نے کہا کیا تم ہمارے پاس اس لیے آتے ہو کہ جس راہ پرہم نے اپنے باپ دادا کوپایا ہے، ہم اسے چھوڑدیں؟

اور (چاہتے ہو کہ) ملک میں تم دونوں (موسیٰ وہارونؑ) کو اقتدار حاصل ہوجائے

ہم توتم پرایمان لانے والے نہیں ہیں( تمہاری باتوں کوکبھی سچ نہ جانیں گے)

اور(موسیٰ سے مقابلہ کے لیے) فرعون نے حکم دیا کہ تمام ماہر جادوگروں کومرے پاس لے آؤ۔

پھر جب جادوگرلائے گئے توموسیٰ نے ان سے کہا۔

ڈالو جو کچھ (جادو) تم کوڈالنا ہے۔

پھر جب انہوں نے اپنا جادوڈالا(یعنی جادوکی رسیاں لاٹھیاں زمین پر ڈال دیں) توموسیٰ نے کہا جوچیزیں تم بنا کر لائے ہو، جادو ہے۔

یقینا ًاللہ تعالیٰ ابھی اس کوباطل کیے دیتے ہیں۔

یقیناً اللہ تعالیٰ مفسدین کے کسی عمل کوبارآورہونے نہیں دیتے۔

اوراللہ تعالیٰ اپنے حکم سے حق کا حق ہونا ثابت کردکھاتے ہیں۔

خواہ مجرمین کے لیے کتنا ہی ناگوار ہو۔

پس موسیٰ پران کی قوم کے چند نوجوانوں کے سوا کوئی ایمان نہ لایا۔

محض اس خوف سے کہ فرعون اوراس کی قوم کے سردار انھیں اپنے جور وستم کا تختۂ مشق نہ بنالیں۔

اور(واقعہ یہ ہے) فرعون ملک میں چھایا ہوا تھا۔
اوروہ حدود عبدیت سے تجاویز کرنے والوں میں سے تھا۔ (یعنی اپنے مطلب کے حصول کیلئےبدسے بدتر طریقہ اختیار کرنے میں تامل نہ کرتا تھا)

اور موسیٰ نے کہا، ائے میری قوم کے لوگو! اگرتم اللہ تعالیٰ پرایمان لائے ہو تو (ایمان کا اقتضاء ہی یہ ہیکہ) اسی پربھروسہ رکھو (فرعون کے جور وستم کے خیال سے گھبراؤ نہیں) اگر تم واقعی مسلمان ہو(اطاعت گزار فرمانبردار بنے رہو)

توقوم نے کہا ہم اللہ تعالیٰ ہی پربھروسہ رکھتے ہیں۔

اوردعا کی کہ ائے ہمارے پروردگار! ہم کوظالم قوم کے ظلم وستم کا نشانہ نہ بنا۔

اورہمیں اپنی رحمت سے کافرقوم سے نجات دیجئے اوران کے ظلم وستم سے محفوظ رکھئے)

اورہم نے موسیٰ اوران کے بھائی (ہارون) کے پاس وحی بھیجی۔

کہ اپنی قوم کے لیے مصرمیں مکان بناؤ۔

اوراپنے مکانوں کوقبلہ بناؤ(مساجد کا کام لو)

اوران میں نمازیں قائم کرو( جب کہ دنیا شرک سے بھرجائے اوراہل ایمان ستائے جانے لگیں) اوراہل ایمان کوخوشخبری سناؤ کہ( اللہ تعالیٰ تم کوغلامی سے نجات دیں گے)

موسیٰ نے اپنے رب سے دعا کی ائے ہمارے پروردگار! آپ نے فرعون اوراس کے سرداروں کودنیا کی زندگی میں بڑی خوشحالی بخشی زیب وزینت اورمال وزردے رکھا ہے۔

ائے ہمارے پروردگار! کیا یہ اس لیے کہ وہ (اپنے زورقوت سے لوگوں کو) آپ کی راہ سے بھٹکائیں؟

ائے ہمارے پروردگار! ان کے مال ومنال برباد کردیجئے

اوران کے دلوں کوسخت کردیجئے کہ وہ ایمان نہ لائیں جب تک کہ

عذاب الیم کودیکھ لیں۔

اللہ تعالیٰ نے فرمایا تمہاری دعا قبول کرلی گئی لہٰذا تم (دونوں اپنے دین پر) ثابت قدم رہو۔

اوران لوگوں کے کسی طریقہ کی پیروی نہ کرو جو(دین کے تعلق سے) کچھ بھی نہیں جانتے۔

اورہم نے بنی اسرائیل کودریا سے پاراتارا(جوان کے راستہ میں حائل تھا)

پھر فرعون اوراس کے لشکر نے سرکشی ظلم وتعدی سے ان کا تعاقب کیا (دریا کے کنارے پہنچا اسی راستے دریا میں اتر پڑا جب وہ لشکر کے ساتھ وسط دریا میں پہنچاتوپانی کے دونوں حصے مل گئے اوروہ غوطہ کھانے لگا)

جب وہ غرق ہونے کے قریب ہوا تو

کہا میں ایمان لایا کہ اللہ تعالیٰ کے سوا کوئی معبود نہیں وہ اللہ جس پربنی اسرائیل ایمان لائے ہیں اور میں مسلمانوں (یعنی فرمانبرداروں ) میں سے ہوں۔

(اللہ تعالیٰ فرماتے ہیں) اب ایمان لاتا ہے اور تو اس سے پہلے نافرمانیاں کرتا رہا حالانکہ توفساد مچانے والوں میں سے تھا۔

لہٰذا آج ہم تیرے بدن کودریا میں ڈوبنے نہ دیں گے تا کہ (تیرا بدن) آنے والی نسلوں کے لیے عبرت کا ذریعہ بنارہے

اوربہت سے لوگ ہماری نشانیوں (یعنی قدرت) سے بے خبرہیں۔

اوریقیناً ہم نے اسرائیل کورہنے کے لیے اچھا ٹھکانا دیا۔

اورانھیں اچھے سے اچھے وسائل معاش دیئے۔

مگرانہوں نے اس وقت اختلاف کیا جب کہ علم حق (القرآن) ان کے

پاس آیا۔
بے شک تمہارا پروردگار قیامت کے دن ان کے درمیان ان تمام امورمیں فیصلہ کردے گا جس میں وہ اختلاف کرتے رہے تھے۔

پھراگر آپؐ کواس کتاب کے بارے میں جوہم نے نازل کی ہے (مخالفین کے مسلسل انکارکی وجہ) کچھ شک وتردد پیداہورہا ہے؟

توان لوگوں سے پوچھ لیجئے جنہیں آپؐ سے پہلے کتاب دی گئی تھی اوروہ اس کو(بڑی ہی نیک نیتی سے) پڑھتے رہتے ہیں( وہ اس کے منزل من اللہ ہونے کی گواہی دیں گے)

بے شک آپ کے پروردگار کی طرف سے آپ کے پاس (دین) حق آچکا، لہٰذا آپ شک کرنے والوں میں سے نہ ہوجانا۔

اورنہ ان لوگوں میں سے ہوجانا جنہوں نے اللہ تعالیٰ کی آیتوں کوجھٹلایا، ورنہ نقصان اٹھانے والوں میں سے ہوجاؤگے۔

جن لوگوں کا ایمان نہ لانا آپؐ کے پروردگار کے پاس طے شدہ ہے وہ کبھی ایمان نہ لائیں گے۔

خواہ کتنی ہی نشانیاں ان کے پاس آئیں۔(وہ ایمان نہ لائیں گے) جب تک کہ وہ دردناک عذاب کودیکھ نہ لیں۔
(عذاب دیکھنے کے بعد ایمان لانا مفید نہیں ہوتا)

قوم یونسؑ کے سوا کوئی بستی ایسی نہیں گزری(جہاں عذاب کے آثاردیکھ کر) قوم کا ایمان لانا سود مندہوا ہو۔

جب وہ ایمان لائے تودنیوی زندگی میں ہم نے ان سے ذلت آمیز عذاب دورکردیا۔

اورکچھ عرصہ تک دنیا سے استفادہ کرنے کی ہم نے ا نہیں مہلت دے دی۔

ائے نبی(ﷺ) اگرآپ کا پروردگار چاہتا توجتنے لوگ زمین پرہیں سب کے سب ایمان لاتے۔

کیا آپؐ لوگوں پراس وقت تک زبردستی کرنا چاہتے ہیں جب تک کہ وہ مومن نہ ہوجائیں۔

اِذنِ الٰہی (توفیق الٰہی) کے بغیر کوئی شخص ایمان نہیں لاتا (توفیق الٰہی اسی کو نصیب ہوتی ہے جو احکام الٰہی سے توافق کرتا ہے۔ طالب ہدایت کو ہدایت نصیب ہوتی ہے)

اورجولوگ عقل ودانش سے کام نہیں لیتے یعنی علم الٰہی کی روشنی میں دین کوسمجھنے کی کوشش نہیں کرتے اللہ تعالیٰ ان کوانھیں کے اپنے شرک وکفر کی گندگی میں ڈالے رکھتے ہیں۔

ائے نبی ان سے کہئے جوکچھ آسمانوں اورزمین میں ہے وہ انھیں آنکھیں کھول کردیکھیں (ایمان لانے والوں کے لیے ہرطرف قدرت کی بے حد وبے حساب نشانیاں پھیلی ہوئی ہیں۔)

اورجولوگ ایمان لانا ہی نہیں چاہتے ان کے لیے نشانیاں (معجزات) تنبیہات کبھی سود مند نہیں ہوتیں

کیا یہ لوگ ویسے ہی دن دیکھنے کے منتظر ہیں جیسے کہ ان سے پہلے گزرے ہوئے لوگ دیکھ چکے ہیں۔

کہئے پھرتم بھی انتظار کرومیں بھی تمہارے ساتھ انتظار کرتا ہوں۔

پھر ہم نے اپنے رسولوں کواوران لوگوں کوجوایمان لائے تھے، اپنے عذاب سے بچالیا۔

اس طرح اہل ایمان کوبچالینا ہم نے اپنے آپ پرلازم کرلیا ہے۔

ائے نبی(ﷺ) کہئے، لوگو! اگرتم کومیرے دین میں کسی طرح کا شک ہے۔

(توسن لو) میں توان کی عبادت نہیں کرتا جن کی تم اللہ تعالیٰ کے سوا عبادت کرتے ہو۔

لیکن میں تواسی اللہ کی عبادت کرتا ہوں، جوتمہاری روح قبض کرتا ہے (موت کے وقت ہی آنکھیں کھلتی ہیں، اس وقت کی توبہ کوئی قیمت نہیں رکھتی)

اورمیں حکم کیا گیا ہوں کہ مومن ہی بنارہوں۔

اوریہ حکم دیا گیا ہے کہ سب سے یکسوہوکر اپنے آپ کو دین الٰہی پرقائم رکھوں(یعنی اللہ تعالیٰ کی عبادت ایسی یکسوئی کے ساتھ کروں کہ کسی دوسری طرف میلان نہ ہونے پائے)

اورمیں مشرکین میں سے نہ ہوجاؤں۔

اورحکم دیا گیا ہے کہ (خبردار) اللہ تعالیٰ کے سوا کسی اور کونہ پکارنا، جونہ تم کونفع پہنچاسکتے ہیں اورنہ تمہارا کچھ بگاڑسکتے ہیں۔

پھراگرتم نے ایسا کیا توتم بھی ظالموں میں شمار کیے جاؤگے۔

اوراگراللہ تعالیٰ ہی آپ کوکسی تکلیف میں مبتلا کردے توپھر اس کے سوا کوئی اس تکلیف کودفع نہیں کرسکتا۔

اوراگر اللہ تعالیٰ آپ کونفع پہنچائے توپھرکوئی اس کے فضل کوروک نہیں سکتا۔

وہ اپنے بندوں میں سے جسے چاہتا ہے نوازتا ہے اوروہ بڑا ہی معاف کرنے والا رحم فرمانے والا ہے۔

ائے لوگو! تمہارے پروردگار کی طرف سے تمہارے پاس دین حق آچکا ہے۔

توجوکوئی ہدایت حاصل کرتا ہے تواسکا ہدایت یافتہ ہونا اسی کیلئے مفید ہوگا۔

اورجوکوئی گمراہی اختیارکرتا ہے توگمراہی کا وبال اسی پر پڑے گا۔ اورمیں تمہارا وکیل نہیں ہوں یعنی تمہاری طرف سے پیروی کرنے نہیں آیا ہوں۔

اور ائے نبیﷺ جووحی آپ کی طرف بھیجی جاتی ہے اس کی اتباع کیجئے اور صبر کیجئے (یعنی مخالفین اسلام کی طرف سے کتنی ہی اذیتیں تکلیفیں پہنچائی جائیں، دل آزاری کی جائے، برداشت کیے جایئے اورثابت قدم رہئے)

تاآنکہ اللہ تعالیٰ فیصلہ کردے اوروہ سب سے بہتر فیصلہ کرنے والا ہے۔